sabato 30 maggio 2015

su cantigu de sas criaduras .. de Santu Franziscu










Santu Franziscu .. su cantigu de sas criaduras


Mannu, omnipotente Segnore diciosu.
 Tuas sunt sas laudes,
sas glorias e s’ unore et ‘onzi beneiscione.
Solu a Tie, Mannu, si addeghent,
 e perun’ omine est dignu de ti mentovare.

Sies laudadu, Segnore meu
chin totu sas criaduras tuas,
mescamente segnore frade Sole,
su cale est die, e nos illuminat pro isse.
Et  isse est galanu et lughente
chin lugore mannu:
de a Tie, Mannu, gighet sas intragnas.

Sies laudadu, Segnore meu,
pro sorre Luna e pro sos isteddos:
in chelu las as frommadas
 giaras, pretziosas e galanas.

Sias laudadu, Segnore meu,
 pro frade bèntu E pro s’ aèra, sas nues
e su serenu et pro dònzi tempus,
pro su cale, a sas criaduras tuas das  amparu.

Sias laudadu, Segnore meu,
 pro s’ abba, sa cale est meda de bonu profetu
 et umile et pretziosa et bìnnida.

Sias laudadu, Segnore meu,
pro frade fogu, pro su cale allughes sa note:
et isse est bellu e giocundu et robbustu e forte.

Sias laudadu, Segnore meu,
pro sorre nostra mama Terra.
Sa cale nos muntenet et guvernat,
e produit  divescias frutures
 chin fiores coloridos et elva.

Sias  laudadu, Segnore meu,
 pro cussos chi peldonant pro amore Tou
e apasigant maladias e tribulias.


Beados cussos chi pessighint sa paghe,
 ca dae a Tie, Mannu, siant incoronados.

Sias laudadu, Segnore meu,
pro sorre  nostra, morte corporale,
dae sa cale perunu omine bivente podet fuire:
guai a cussos chi ant a morrer in pecadu mortale;
beados cussos chi s’ant  at agatare
 in sa santa voluntade Tua,
ca sa morte chi at a benner
non lis at a poder fagher dannu.

Laudade e beneighide su Segnore meu
e ringratziadelu et servidelu chin  umilesa manna.

che rocas de Caddura..
















che rocas de Caddura..


Comente custa pedra de Caddura
S' ispijat in sos ojos de sa zente
In s' abba  de su mare isplendente
Su bellu 'idu  e  gai tentu in cura.
Cando non s' at  de s' ateru paura
S' abberit in su coro unu poltale
Est tando chi su bene binchet  male.
Su donu pius mannu  'e sa  natura

Bona die .. e chi siat soliana
pro totu sos chi bivent a s' iscuru.
Pro chie   coro gighent de ferru

gai fritu che s' astrau in s' ijerru.

Sa lughe chi connoscant issos puru
e bidant cantu sa vida est galana

venerdì 29 maggio 2015

internet sotziale
















internet sotziale


De totu sos chi bido e apo a notu
Inoghe los agato ben’ o male
Legende totu paris su missale
Parimus in sa missa unu fiotu
Chie pessat d’ esser su caldinale
E ponet totu cantu in abbolotu
Iss’ est isse ebbia ..et est totu
Sa bera santidade chena male
Mischinu su chi non bidet burgùla
In coro cando pessat pro isse
Si pessat d’ esser mannu .. d’ esser solu
Ite male cunvintu.. ite cossolu.
Su mundu tand’ abbratzat che Ulisse
E morit .. issaeschidu in bula.

tennera Patada

tennera Patada

Patada est una criadura
chi cheret esser solu ninniada..
In cue est posta e pasada
in lacu de sa prima naschidura.
Aju nd’ amus de issa sa mirada
cando nos leat fea sa tristura..
Accolla! chi nos dat sa misura
d’ aer in coro vida soliana.

su zingaru

su zingaru
No est de sa natura su ruinzu
chie naschet in logu disagiadu..
mancu de su dimoniu su pinzu
ca zeltu non l'at isse ischirriadu.
Poveru.. destinu pupuinadu
de linna chi non balet s' allughinzu.
Ma tue .. chi ses de mama s' anniju
ti ses abbaidadu in s' ispiju?

giovedì 28 maggio 2015

su 'asu



















Su ‘asu


Su primu ‘asu chi nos dat sa vida
est cussu chi nos torrat a sa mente..
su caldu late ‘e mama a s’arveschida
disizu ‘e vida , e de vida sermente. 
Paret chi siat bon' usu in dipartida
de narrer “mama mia” torra presente..
cuss’ asu de sa prima naschidura
chelzo gosare torra in partidura.


Totu   sos milli.. e milli pius ancora
porridos o furados  a sa cua..
rezidos  da' una dea  incantadora
dae Giuda falzu chi a niune ajuat.
Chie  sos pes  basat  et   onorat
de  anzenos  ..  comente mente sua.
Totu custu  basare est in difetu
ca no cumprit  de sa vida  diletu.

Unu basu  est bellu e corporale
cussu chi passat a su coro alenu..
cando  in su  disizu  est iguale
s’ affetu  chi si donat chena frenu.
Donzunu  est  unicu  originale
comente primu ‘asu dadu a lenu..
penseri, gosu  e de natura fatu
custu menzus est de laras  cuntatu.



Il bacio

Il primo bacio che ci da la vita
È quello che ci ritorna in mente
Il latte caldo di mamma all’ aurora
Desiderio di vita.. e di vita seme.
Sembra sia buon uso alla partenza
dire:”mamma mia” torna presente..
Quel bacio della prima nascita
Voglio gioire ancora nella dipartita.

Tutti i mille.. e mille ancora di più
Donati o rubati di nascosto..
Ricevuti da una dea incantatrice
Dal falso Giuda che nessuno aiuta.
Chi i piedi bacia ed onora
Degli altri.. come la sua mente.
Tutto questo baciare è in difetto
Perché non onora di vita il diletto.

Un bacio è bello e corporale
Quando concede respiro al cuore..
e quando nel desiderio è uguale
L ‘all' affetto che dona senza freni.
Ognuno è unico ed originale
Come il primo bacio dato timidamente..
Pensiero.. gioia e della natura il fato
Questo è delle labbra.. il miglior contatto.

mercoledì 27 maggio 2015

A belidas.. de tempus benidore


















A belidas.. de tempus benidore


S’ intendet  dae atesu  unu cunzertu
dae s‘ adde  in sas alas   ispalghende:
zocos de  picarolas  a s’ inzertu
impar’ a sos marrazos sunt sonende.
Campanas  atonadas  o  in chertu
anzones chi  sas mamas sunt chilchende..
su cane  betat   como unu giannitu
pro lepere  ch' in  tupa   fit apitu.

Sas boghes  de sa truva ’e su pastore
“erigà” ..pro cuss'  ama tot’ ispalta:
manizadas  e pedras ch’ est  bolende

a  chirrios  chi si  sun   istejiende.
Pustis   anzende,  un’ annija s’ iscaltat
a belidas … de   tempus  benidore.

martedì 26 maggio 2015

TRATAS LEZERAS D’ INTIRINADA


















TRATAS LEZERAS D’ INTIRINADA 


Cando falant sas umbras  de su sero
pro  saludare, 
benit dae atesu ,
unu  sonu ‘e campanas  acoradu.
Su costialvu  ‘etzu, abbandadu
dat a su ‘entu  e a su carignu amigu,
una tremida 'e fozas, malaidas –sicas.
Unu trenu  curret  isferranghinende,
mandende in chelos..  sos bujos  cantigos suos:
tristos  che tacullidas issaeschidas.
Sunt afundadas  isperas  giovaniles,
isetos,  illusiones e tropu sonnios
in abbas  murinas de malinconia.
Unu mare de ammentos, chi  s’at ingullidu
sos gosos culzos e sos afannos mannos.
Sas dies sunt passadas che a pedras,
no cherent pius gherrare  sos balentes,
sos naufragos  sunt istracos  de sa lota.
Si sunt imbeltas, in buscos  e in sos campos,
in camineras chi ant  cambiadu chitza,
tratas  lezeras de sa pitzinnia.

lunedì 25 maggio 2015

Su tempus est bellesa..

Su tempus est bellesa..


Chie narat chi su tempus gai
che mundat su male e sa bellesa...
comente s' odiu dae s' ofesa
e puru b' est chie non morit mai.
Si podet fuire dae s' arguai
ma non dae su disizu de sa sorte..
tando totu est bellu .. finas morte
s' isfida de sa vida: "dai..dai !!".

recuende suta 'e s' abba











recuende suta 'e s' abba

A sero in s’ impedradu recuende
Sut’ e s’ aera .. una dulche moddina
sas boghes de s' allegra piseddina
isculto .. e parent mi siant sighende.
Mi 'olto .. accò si ch' est fuende
su cantu ..chin su ballu 'e pitzinnia
lu frimmu tando in versu 'e poesia
ebbai sigo illusu passizende.

sabato 23 maggio 2015

Giovanni Falcone













Giovanni Falcone


Podet morrer s’ alenu e sa carena
Ma nudda  bochit sa forz’ e s’ idea
Bijone  meda forte e manichea
De chie  sighit su bene .. e at male in pena
Su sambene chi curret in sa vena
Li  samunat  dae s’ anima   pelea
Nde coglit  in sa vida totu  intrea
Sa broca  de s’ onore chi pienat

Diai  …  como chi su tempus passat
Sos ojos e sorrisu  sunt presentes
Sa gherra at cumbàtidu et  bissa

Muntesa l’ at  chin nois sa promissa

Sa gloria in totu sos continentes
Falcone chin s’ esempiu  at postu e lassat.



venerdì 22 maggio 2015

Sos deghe cumandamentos















Sos deghe cumandamentos


Sos pecados mortales
isculpidos a fogu
coglidos  in sa pedra dae Mosè
deghe  sunt virtuales
pro ateros  b’ at logu
francu in cussideru de su re
coment’ onzi fastitzu
b’ at fizastru e fitzu
su chi balet pro te no est pro me
fuende dae s’ Egitu
dae Sinai fin’ innoghe che l’ at gitu.

narat chi  a sa sola
unigu  Criadore
su beru  Deus in chelu, terra e mare
pro  s’ omine s’ iscola
‘ue fuit dae  s’ errore
invanu mai est de numenare
sa di’ e su Segnore
sas festas in onore
ammenta  prima de santificare
si non coglis su frutu
morit sa die passad’ in corrutu

no est d’ ismentigare
su babbu e sa mama
pro cantu dadu t’at  carena e mente
sempre de l’onorare
su mamentu ti giamat
su samben in sas venas currente
non  chilches su difetu
dae donos’ afetu
e  cantu podes dare eternamente
duos pro unu solu
t’ ant dadu vida, isper’ e cossolu

non fatas s’ atrivida
mancu de lu pessare
chi potas  ater’ omine bochire
su bene de sa vida
non si podet furare
sa prima cosa in naschida de ischire
si in cussu male rues
bides solu sas nues
in vida tua chi  faghes fuire
a sa mantessi sorte
ligadu ses in sa vid’ e sa morte

ama su ch’ est d’ amare
sa femina isposa
onora  cantu in fide promissa
zenia de pesare
restat  frisca che rosa
solu   cando  ti dedicas a issa
donzi alciad’ e conca
che ‘essis in birronca
e pones gherra tra pasu e rissa
uniga  sa regnante
muzere in coro e mente est s’ amante

non si podet furare
cantu  as in disizu
si nudda faghes pro  nd’ aer diritu
chena lu comporare
de dimoniu fizu
ti gighet a s’ ilferru dritu-dritu
de sa cosa furada
non s’ at mai gosada
non ses  mere de domo, ma in afitu
chie non l’ at cumpresu
finit  chin manos e chin mente presu

faul’ e testimonzu
contr’ a sa veridade
no ischit cantu podet fagher male
pro malu o pro bisonzu
cambiat sa calidade
ma semper cufundet  su chie e su cale
donzi  paraula nada
est una cantonada
s’ est falza ruet in conca che sessale
pro fagher cosa giusta
nara comente manigas e bustas

sa femina isposa
o puru fidanzada
est  una lugh’e  chelu che isteddu
chin ateru reposat
non cheret  pelcossada
no istes fat’ e issa che cateddu
de  mente faghe s’ usu
e non fates abusu
de debiles’ e coro o de chelveddu
chin su penseri netu
s’ abberin  aidos de su rispetu

in finis sos disizos
su totu ‘e rispetare
francu  d’ aer pro se, sa cos’ anzena
comente sos imbizos
ti faghen  marronare
nudda  ti poden dare a sa carena
si cheres biver bene
isperia su chi tenes
no istes apitende che sa iena
pro su menzus  istare

cossizo pius de  dare… che leare.