Dae sempre…

Dae sempre…

Su ‘entu, s’abba donat sa natura

de frommas chi ispantan sa mirada,
cando sa manu 'e s’ omine ‘oltada
non la pelcossat e sa bellesa furat.
Gai  montes e addes de Patada
sun dae sempre museu in abeltura,
chi a s’indonu pro totu sun sa cura
pro su disizu ‘e s’anima agatada.
Custa fortuna in grascias est falada
pedende solu dae coros calura,
chie bi ponet passos o b’addurat
su tempus de li dare iscampiada.
Comente sa bellesa pius pura
no at bisonzu d’essere trucada,
bastat de la leare a s’abbratzada
cando at bisonzu e sentit paura.
In tempos malos, l’ap’ ida s’iscura
patende sorte mala ilfortunada,
fogos e zapos l' aian triulada
fata in piantos e niedda che mura.
Cando la ido dae ‘Unne a sa Jura
mi paret de la gighere cuada,
intro su coro dae sempre disizada
'alu la gito ..e sempre dat gosura.

Da sempre..

Il vento.. l’ acqua donano alla natura

Le forme che meravigliano lo sguardo..

Finché la mano dell’ uomo rovesciata

Non la violenta e gli ruba la bellezza.

Così i monti e le valli di Pattada

Sono da sempre un museo aperto..

Che gratuitamente son la cura per tutti

Per il desiderio di un’ anima ritrovata.

Questa fortuna è scesa dalla grazia

Chiedendo solo il calore dei cuori ..

A chi  è di passaggio oppure ci vive

Il tempo di  poterla   osservare.

Come la bellezza più pura

Non necessita di alcun trucco..

Basta abbracciarla

Quando necessita e sente paura.

In  tempi cattivi l’ ho vista .. poverina !

Soffrendo malasorte sfortunata.

Incendi  e  arature l’ avevano sconvolta

Fata piangere e resa  scura come la mora.

Quando la  guardo da ‘Unne alla Giura

Mi pare  ti tenerla nascosta

Dentro il cuore .. come sempre desiderata

Ancora la tengo.. e sempre mi da gioia. 

su presepiu

Su presepiu

Chi siedas o non siedas credentes
Pagu contat in su fagher comune
No est s’ esser ligadu ubbidiente
Nenmancu d’ esser presu a d’ una fune
Siat pro bene d’ aminu o mente
S’ obbrigu non lu ponet niune
E tando falo Cristos dae su jau
Pro non esser de modas s’ isciau

Impare a Isse torro a piseddina
E fato unu presepiu che tando
Iseto miss’ e puddu e do’ s’ istrina
Pustis de sos pecados mi dimando:
“it’ est sa di’ e festa chi cumbinat
Si totu a s’ olvidu ponzo e mando?”
Pro custu.. pro s’ esser.. pro sa presentzia
Presepiu est sa proa de s’ esistentzia.

Milano

Milano

Milano.. pro degh' annos domo mia
inghirios de sa vida ch' est passada
sos bisos in 'olos de fantasia
sa 'idda chi m'at dadu e apo amada
sa musica .. s'isport totu l' idia
cuss' arte ambrosiana in sa mirada
su duomo e sos palatos modernos
totu restan in coro sempiternos

a sero

..  a sero

Sa frina de s’ aer’ e su manzanu

Che bogat  dae sas fotzas su lentore

Pilos  a bentu ‘e pitzinna minore

Chi curret  e isalenat  a  pianu .

Mujada.. una femina sa manu

Dat s’ amparu  a su betzu amore…

Puzzones   cantant  comente tenore

In subra su balcone coglin ranu.

Su nuscu gai fungutu ‘e  sa tiria

Coberit sa campagna e su  fiore

Est  issa  prima donna e maestria

Sa forza.. sa custascia e su colore.

Sempr’ issa  mirat e coro   cheriat

De  abes  chi la chilcian  de amore..

Raighinas.. cambos e finas sas fotzas

Parent  de mama .. sos dolos in botzas

Su bellu de su sero chi si coglit

Est sintesi chi curret in lestresa

su sole chi sas dies inurgoglit

sas miseras fainas chena resa.

In fora de gianniles si regoglit

Cuss’ uman’ amargura e s’ offesa..

A sero  totu cantu  si remonit

Cantu benit  bivìdu … si costoit. 

Narat paraula a sa poesia:

Narat paraula a sa poesia:

Narat paraula a sa poesia:
“Comente poto a tie cumponner?”
Issa li rispondesi : “amiga mia !!
Ite cheres a tie risponner?
Si cheres sighire cussa bia:
conca l’iscriet si coro b'at a ponner ,
tando s’aunit in d’una melodia
chi brincat muros e su ch'est in bia”

Ma si ti pessas de podere cantare
pro nde fagher de tene s'autore,
est solu illusion' elementare
d' esser a s' improvis' unu cantore.
Sa poesia no est solu rimare
o puru fagher versos chin amore,
ma totu su chi est in sa natura
chi narat beru e faul' iscurat.

Cando ti paret d'aer pesadu 'olu
est tando ch' in aera ses peldende
sas pumas chi ti rendene lezeru

c'as leadu onzi cosa pro veru.
Apenas ti nde ses ilmentighende
rues a terra che  prima.. cue solu.

Recuende

Recuende



In fundu a sa longa caminera
su ruju leat logu in s’ orizonte.
Pro diciu est sinnu de ispera
su sole chi si cuat in su monte.
Intendo calecunu: “bonasera!!”
de zente chi mi passat de fronte..
o forzis su sos alvures d’ olia
chi m 'iden recuend' a domo mia.

Mi paret de biver for' e su mundu
s' abbaido 'ue ferit sa mirada...
cuddae mi che  paret pius in fundu
pesso de l'aer  bida e tocada.

Est sa memoria  de vida passada
chi nd' ogat sos ammentos dae profundu.

Urgogliu sardu

 urgogliu sardu

Como chi nos as dadu leiscione
nende: “ chi ses tue de terra mere”
Abba ‘e chelu .. unu bulione
maridu a bratzeta a sa muzere.
Tirannu ses bistadu che Nerone
ma non pesses de nd’ aer piaghere,
As bissu de sa gherra una batalla
s’ urgogliu nos restat.. s’ ultima balla. 

Si mi dades iscultu pro un’ istante
chilco de fagher cosa ‘e galania
Forzis sa vena tantu no est bastante
pro ponner totu cantu in poesia.
Finamentra si gana est custante
no sempre at amparu e fantasia..
ma si onzunu bi ponet de isse
si faghet viagiu longu che Ulisse.

Limba, no ses limba ilmentigada
finas si meda ti sun olvidende,
no ischin ite cantu sun peldende
tue in gangas ses apoderada.
Dae manzunu a sero, isto pessende
si in sa gruta ti che ses cuada,
cantu est nudda a s’ ater' ojada
mi rendo contu in tempus passende.

Cando faeddo chin sa limba istranza,
isco e pesso sempre a bisu tou,
de ateras no nd’ isco fagher zou:
de itala, inglesa o de Franza.
Lassamulas istare a bonu sou
che istoigas erveghes chi no anzan,
sun che musica ‘e fora in sa danza,
bellas si ma sunt ateru brou.

Limba ses limba si tue ses amada
dae chie ti gighet fatu totue,
mai dudas nen mai una nue
in caminu de vida atraessada.
Inoghe, in continente fue fue
t’apo chilcadu che sienda bramada,
e como in s’ edade avantzada
ti gito 'ue s’amore b’est in cue.

Limba chi sonas una campanella
das armonia chi leat su coro,
no perdas mai sa ‘oza d’esser bella
muntene altu  sensu 'e su decoro.
In virtudes restas sa virzinella
alu ses pura, simile a s’oro,
tue non ses in fatu a niune
de sa campana ses pirone e fune.
.

Cando t' intendo ispalta in sa leada
mi paret d’iscultare unu tenore,
boghes ladinas de cussa cantada
de sa Barbagia chi lean su core.
Su cantu in re e sa faeddada
colorit et adornat che fiore,
su sardu faeddadu dae sa zente
in donzi zassu 'e custu continente.

Sa poesia pesada in Logudoro.
Sos cantos bezos in alta Caddura
Sos contos de totu su Campidanu

issos de sa Sardigna sunt tesoro.
Sunt sabies’ e vida e criadura
Sunt cussos chi nos pedint sa manu.

Pro cantu si nde faghet poesia...

Pro cantu si nde faghet poesia...

Pro cantu si nde faghet poesia
S’ amore e s’amistade paret trista

Totu la diant cherrer a sa vista
Ma pius de coro si pienat sa ‘uca
Iscritu l’at in s’ evanzeliu Luca
Impare a su peldonu e caridade

Pro cantu si nde faghet poesia
Paret trista s’ amore e s’amistade

De s’ umanu sa menzus calidade
Est d’ esser a Deus riconoschente
Totu che pare naschid' innozentes
Chena difetu e nen disunore

Pro cantu si nde faghet poesia
Paret trista amistad’ e amore

It’ est chi at impoltu e valore
Si non d’ aer amigos in caminu
Ch’ azendent in su buju unu lominu
A su bisonzu illuminant sa pista

Pro cantu si nde faghet poesia
S’ amor’ e s’amistade paret trista

Como paret chi siat pius abbista
Pessona chi resessit a sa sola
Gai su tempus passat e che colat
In sonniu de presumu e soledade

Pro cantu si nde faghet poesia
Tristu paret s’ amore e s’amistade

Si cantu nde rezides pustis dades
d’ affetu si frementat sa richesa
in coro leat logu sa bellesa
pinghende finas note de colore.

Pro cantu si nde faghet poesia
Trista paret amistad’ e amore.

Peleas, disamistade e dolore
Sunt cue chi isetant apitu
Mai chi apant in coro s’ abbitu
E amistade nde fatat conchista

Si totu cantamus in poesia
S’ amore e amistade no est trista.

rugas

rugas

Sas rugas chi ti sulcian sa cara
iscobian su ch' as apidu e dadu,
s' istoria pius unica che rara

dae sempre pro me.. menzus contadu.
Sa naschida alu est in ammentu
comente totu su tempus passadu..

e como chi s' andare t’est lentu
l’ azetas comente l'as isetadu.
Non faghes de s’ anneu unu lamentu,

anzis pessas chi totu siat de fadu..
Abbaidas totu su ch'’ est in bia
frimmu comente semper est ‘istadu.

Una pregunta, un’ ave Maria
e sighis in sos tuos pensamentos..
Forzis a cando in segus chilcaias

rejones chi porrin sos sentimentos.
In megus restat sa ruga isculpida
d' affetu.. e de cussos momentos

chi tantu m' an imbiad' a sa vida
cussa chi tando.. bella mi faghias.

su 'olu

su 'olu

Un’  anghelu..  una pum’  in su bentu

Su bolu   frimmu.. altu de s’ astore

Lezeru comente su pensamentu

totue  bolat… donende   s’amore

est cussu chi si narat sentimentu

su sinnu  chena tempus nen colore

cand’ isse tocat sonu in sa presentzia

s’ ispideru  malcat de s’ esistentzia.

De  totu sos sentidos.. in s’ erentzia

Su mannu ..  ‘aju  mannu.. su Fatore

Est isse  de s’ umanu sa credentzia

Su Deus .. unu beru Criadore

No est  proa zelta de s’ iscientzia

Non s’ idet .. ma s’ intendet su sabore

Rejone non b’at chi li diat  sensu

Ca de s’ umaniade  est s’ immensu.

Rejone  .. no est e nemmancu pensu

Ma  lutia de abba  dae funtana

Pianu.. pius pianu ..posca  intensu

Abberit  aidòs   in sa lacàna

Non connoschet razza e nen censu

Est unica sa terra chi abbàna

Inie naschet  ignotu e bidu

Progressu e segretos d’ infinidu

 il volo

Un angelo.. una piuma al vento

Il volo planare alto.. dell’ astore

Leggero come il pensiero

Ovunque vola.. donando l’amore.

E’ ciò che vien chiamato sentimento

Il segno senza tempo ne’ colore

Quand’ esso fa sentire la presenza

Lo spirito marca la sua esistenza

fra tutti i sentimenti..e discendenti

il grande .. grande vecchio .. il Fattore

è lui nell’ umano .. la  credenza

il Dio .. un vero  Creatore.

Non c’è una vera prova di scienza

Non è visibile.. ma si sente il sapore

Non v’è ragione che ne dia il senso

Perché  è d’ umanità l’ immenso.

Ragione.. non c’è ..e ne’ pensiero 

Ma goccia d’ acqua di fonte

Che piano.. pianissimo .. poi intensamente

Apre varchi  nei muri.

Non conosce razze o censi

Bagnano una sola terra

Ove nasce l’ignoto ed il conosciuto

Il progresso e i segreti dell’ infinito

Siat.. chi siat

Siat .. chi siat   

Sa musica  est  sa risposta giusta

A cantu donat su tempus benzende

A  die passada o chi siat passende

Chi siat   asciuta o puru ilfusta

No at impoltu chi siat cussa o custa

Sa melodia chi ses intendende

Issa.. sol’ issa t’est acumpanzende

Chi siat carignu o colpu ‘e frusta

Issa.. sol’ issa  chi piangat o riat

Est cussa chi pius  leat cumpresa

Totue dae sa naschida a sa morte

Est d’ acumpanzu in su pianuforte.

Dae sa gioventura a sa betzesa..

Sas notas de sa vida.. siat chi siat.

Cara .. ses tue !

Cara.. ses tue

Cara  ses tue,   fiore singulare

ilfusta  su  manzanu de' lentore ,

mancu s’eddia coberit  colore

chi das a chie  ti cheret mirare.

De  meravitza tue  s’autore

in d’ unu mundu  chi t’ischit amare,

ghia 'ereta pro poder  andare

a  logos  ‘ue  bi pasat s’amore.

Cando mi lassas tue a sa sola

in mesu  ‘e  tempestas de deseltu,

pustis  aparis.. luego mi cossolas

su coro  fit  pro te, semper abbeltu.

Como chi  in sas aeras  'olas

andas in lidos  de destinu inzeltu,

comente fato  tando  a cantare

si tue non mi das  ite pintare.?

Pro cantu   t’ apo in sa fantasia

iseto  de ti poder   tocare,

diligos  versos .. umile poesia

‘ue  podes  che istella  brillare.

Mi mancat sa tua cumpanzia,

in disizu de t’  ider ‘intrare,

ca menzus  isto tando, de abberu

tue presente, mi sento   lezeru.

Su zuffu

Su zuffu

Su zuffu chi ti cheret cuare

coberit de sa vida tristu e dolu
Comente una puma de cossolu
Pro te chi tantu cheres respirare
Proa de nou su mundu amare
Sos ojos torra tue a sa lughe
Su nare ilfustu 'e lagrimas giughes
Sas laras rujas dae s’ isalenare

Ama..ama sa vida donzi die
Non sias chin su coro gai severa
Daeli cantu pedit.. a tie

E sempre unu sorrisu de ispera.

Tue comente sole chi s’ ischidat
Cominza die noa a s’ arveschida.

Il ciuffo

Il ciuffo che vorrebbe nasconderti
Copre i dolori e la tristezza della vita
Come una piuma di conforto
Te che vorresti respirare.. tanto.
Prova nuovamente ad amare il mondo
Fai brillare la luce nei tuoi occhi
Il naso bagnato dalle lacrime
Le labbra rosse appesantite dal respiro

Ama.. ama la vita ogni giorno
Non essere severa con il cuore
Donagli quanto ti chiede
E sempre un sorriso di speranza
Tu come il sole che si risveglia
Inizia un nuovo giorno.. all’ aurora.

Orizontes de lughe (Paola Nieddu (Black) e Lussorio Cambiganu

Orizontes de lughe

Inte'!, cando t'amudas ite sentis?

 it' est chi bides intro de s' intragna?

Si ti s'aparan mares o muntagnas

e a sos bisos tuos acussentis ?

Prima lu pessas e pustis ti pentis

malchendel' in niedd' e sa lavagna..

 Nara si su disizu t'acumpagnat

inue su penseri s' ausentit.

Tot’ unu sos colores faghen lughe :

nieddu dae s’ iscuru passat giaru ..

muntagna paret dulche sa pigada

cando ses in chima ‘e sa mirada.

S’ indulchit ch'as a vista unu faru

 Ch’ illebiat de su viver sa rughe.

su podere.. su 'inari e sa poesia !

Scrivete poesie per respirare. Scrivete un milione di versi. Fatelo pensando che c'è in voi una parte migliore: quella che vi parla in silenzio o che vi fa ...

su podere.. su inari e sa poesia

Ma cantas gherras e cantu s’ afannu
Pro setzer un’ iscuta in cadreone
Podere … glorias e sentire mannu
Pro si creer d’ esser Napoleone.
Non biden chi pius de bene est dannu
de nascher comente su faraone..
figuradi si lu pessighin cando
dae piogu coglin … mi dimando?

Si pessat de biver s’ eternidade
Cando s’ inari bident currende
Ma morte sola est s’ avididade
Prima de bider su sole creschende.
Gai comente est sa libertade
Illusione otica chilchende....
Chie creet de la comporare
Isciau ruet .. chena l’achistare.

Est tando chilco ‘e dare risposta
A cantu sos disizos mi cossizan ..
Eo puru ruo in trapula posta
Si isculto sos dialuos chi m’ aizan.
Mi frimmo e de tempus fato sosta
E de sa poesia non s’ abbizan..
Isperio s’ ispiju che Narzisu
E pustis mi fato una mata ‘e risu.