emoscione

Emoscione

Si pingher non ti poto
Pro ti poder frimmare
In coro t’ apo sempre a remonire
In versos como annoto
Cantu resesso a dare
Prima de’ mente podere fuire
Cant’ isto rue-rue
Che ballos subr’ e nues
Ajudu solu a tie poto pedire
Cando m’ istas aculzu
Mi curret forte samben in su bulzu

Peruna faeddada
Ti est in assimizzu
Pius de sos sentidos chi mi detas
In cuss’ incaminada
Bi passo conchi rizzu
Ca isco ite cheres e isetas
Pustis a s’ arrivida
Isperio sa vida
Comente faghen totu sos poetas
Si b’ est sa manu ‘e Deus
Su restu ponet fatu a reteu

No est sa debilesa
Ma umana melodia
Bessida dae coro in bogh’ e gridu
Misciad’ a sa bellesa
Impare a fantasia
Movet s’ amore e totu su sentidu
A bias contr’ a su bentu
Andat in su cuntentu
‘sende chi totu at dadu a su pedidu
Tue ses s’ emoscione
In gherra chin sa leg’ e sa rejone.