meravitzosa

meravitzosa^^^^^^^


Sicas sas naes .. de niberu antigu
Parent sa luna cherrer raighinare
Iss’ atuldida in s’ isperiare
Si frimmat cuss’ iscuta pro azigu
Ben’ ischit chi no est inimigu
Chi li potat sa lughe leare
Anzis si frimmas pro lu faeddare:
“tue de rocas ses sa vida e trigu”

SERENADA

Serenada


Cando ti leo in su pensamentu

no apo  intro ’e coro sa tristura,

si solvet totu a cussa   calura

donzi malannu  chi atit patimentu.

Sorrisu sempre in laras m’addurat

apo sa forza de ateros chentu,

bolo  in fantasia che su bentu

e solu ojos tuos apo in fregura….

No apo sa misura 'e sa bellesa

chi potat a tie simizare,

isco solu chi s'anima inchesa

m'as fatu donzi 'olta, in su  mirare.

Como chi serenada  l' apo istesa

pro poder tue bene reposare,

duas columbas e unu rusignolu

ant a cantare custa a tie solu.

Ettore

Ettore

Iscultas chena connoscher faeddu

Faeddas chena  limba imparada

Mi bides  chena  mi dare mirada

E puru mi  leges in su chelveddu

Su pagu chi mi pedis  tue cateddu

Est  una .. donzi tantu carignada

E tue …  mi la torras donada

Comente  faghet solu unu piseddu

Ettore.. chena lacanas d’ affetu
Ses tue criadura delisciosa
De asos e cuntentu tue mi gosas
Apena m’ ides mi lu das deretu

Gai esseren totu menzus cosas
Chi a s’ indonu non faghen difetu
Comente 'onzi bella criadura

Cheren apen’ e cussider’ e cura
Si m’ ides tristu tue .. istas chietu
Apena rio .. porris asu e posas.

amigu prejadu

amigu prejadu

Amigu chi m’ ammentas dies bonas
passadas paris in sa pitzinnia,
de cossolu in sas dies malas
sempre presente bi fis donzi bia.

Sorrisu e paraulas dae laras
chi m’ ant fatu sentire in cumpanzia,
tue chi faghes palte de sa zente
chi giamat e narat sempre “presente”.

Tantu est manna, cantu s' infinidu
sa botza de ti bider un’ istante,
nessi un' iscuta pro poder torrare
impare a tie e su tempus chilcare..

Bider refressu in d’ unu diamante
cuss’ atimu ch' est àndadu perdìdu.

Amico prezioso

Amico mi ricordi  i giorni buoni

Trascorsi insieme in gioventù

Consolazione nelle giornate buie

Eri sempre presente.. ogni volta.

Il sorriso e le parole  dalle labbra

Che mi hanno fatto sentire in compagnia

Tu che fai parte della gente

Che chiami e sempre  rispondi “presente”.

È tanto grande .. quanto l’ infinito

La voglia di rivederti per un istante

Almeno un attimo.. per poter tornare

Insieme a te .. alla ricerca del tempo..!

Veder riflesso dentro un diamante

Quel momento che è andato perduto.

Ballu a tenore (foto del social Ammentos de Orune)

Ballu a tenore (foto del social Ammentos de Orune)

Cantat sa prima  boghe ‘ e su tenore

Su ch’ apo nadu e postu in poesia

A tie apo porridu a prima ‘ia

Impare unu matul’ e fiores

Sa contra chin su bassu.. it’ onore

 Paret un’ orchestra chi bi siat

Sa mesaoghe li dat armonia

A sa cantone fata pro s’amore

Como si pesant  ballos d’allegria

 Ponzende fatu a sas rimas bellas

In sa piata a lugh’ e istellas

 M’ abbizo che a issas brillaias

Cussa ch’ intendes est sa boghe mia

 Chi coro tocat che’ sa tarantella

 Posta ti l’as a faca  sentinella

De musica in perfeta sinfonia

 Ballade custos versos tot’ impare

Ajanos chin sa menzus gioventura

Ballade chena dudas o paura

Ammentu bonu bi podet restare

Si posca chi su ballu at a passare

Azis a tenner de fiores cura

Forzis custas paraulas bos duran

Cando las azis cras torr’ a cantare .

bellu...

Bellu…


Totu est bellu..una  meravitza:
sa naschida de’ semen’ in fiore,
cando caminat pitzinnu minore
e chi s’ ischina sua ponet ritza.
Gai est bellu su primu amore
chi balet pius de ateros mitza,
bellu cando su male mudat chitza
e torrat in su gosu dae dolore.

Ite mi nades bois  turturellas
a primu bolu in die  ’e beranu,
cando balente bos pedit sa manu
e che sa rosa bos sentides bellas?
E cussu chelu a primu manzanu
chin sole e luna.. et alu sas istellas,
unu raju ‘e lughe in su lentore
faghet brillare de 'onzi colore?

Sa mama dae sa prima pitzinnia
est cosa chi no at paragone,
una sienda manna, una bijone
chi nos cantat sempre sa ninnia.
Pustis passada est s’ ajania
pro sighire sa manna emoscione,
cussa chi de s’ amore est sa mere
pius de milli amantes.. sa muzere.

Cumprit custa vida ‘e meravitza
su frutu chi bi naschet in s’ arbore,
fatu dae sa fortuna e s’ amore
che s’ abba chi li dat e no s’ allizat.
Pro  me est  tesoro, una fiza:
sa vista, sa musica 'e su core,
meda bellesas .. b’ at in su mirare
ma issa nudda de assimitzare.

Orune Bisura

Orune  bisura (foto di Silvestra Pittalis)

^^^^^^^^
Accolla .. pro un’ istante cuss’ impresa
Chi faghet su coro tocheddare
Sa mente puru paret de gosare
De cantu sa bisura dat bellesa
Tres chimas de sos montes in atesa
Pro poder a Orune incorniciare
S’ amore e sa paghe pro li dare
Finas cando su fadu l’ at ofesa.

meda limbas.. limba rica.

meda limbas.. limba rica

^^^^^
Sa poesia est comente trigu
Chi naschet cando est contivitzadu
Però non cheret terra de obbrìgu
Si no d’ incunza non si coglit ranu
Su sardu est su limbazzu antigu
D’ ajudu podet cherrer una manu
E tando si faghimus s’ unione
Non siat in misciaredda o minestrone.

Sa limba in su populu est totu
Comente s’ aria chi nos dat s’ alenu
Su manigu chi dat bentre pienu
faeddu gai nos donat su connotu
limbazzos sunt meda .. unu fiotu
a bias sunt che fitzos chena frenu
mancunu però si narat anzenu
non cherent chi si fatat abbolotu

De regulas non cherent faeddare
ca narant “sunt lacànas de tirannu”
trobeas chi lis diant fagher dannu
manera pro los poder istegare.
No isco comente la pessare
Pro me non b’at contra o afannu
de tempos in passadu patadesu
Mi restat su limbatzu ch’ apo apresu.

Cussa limba comuna l’ apo a notu
E finas ponzo pro issa sa frimma
Però chelzo de issa sa cufrimma
Chi siat solu pro fagher annotu
Sos versos gai iscritos in pinna
Non sunt casu bonu .. ma regotu
Mancari a fumu puru mustiadu
o puru .. comente cane crastadu

Presumos.. dudas e meraculos (dipinto di Mauro Puddori)

Presumos ..meraculos e dudas .. pintura de Mauro Puddori

Eo semeno in penseri duda
la gito fatu e ando custante
meraculos chi bessint a s’istante
comente limba chi abbarrat muda.
S’iscentzia pro cantu paret brillante
donzi tantu si mustrat che Giuda
a bias d’asu ti dat sa zeltesa..
su cras manzanu s’ anca est istesa.
Non b’at in megus dubbiu perunu
chi vida non podet dare zeltesa:
‘oe est goi cras est male presa..
meraculu no nde bides mancunu.
S’iscentzia semper est in sa pretesa
de narrer “eo so numeru unu”..
pestanu tra s’arrogu e s’ignotu
ischirrio dubbiu dae sempre notu.
Totu a su penseri est cunzessu
siat iscentzia che sa santidade.
Su chin non torrat mai in veridade
est sa prepotenscia in su progressu.
Finas s’ illusione ’ e santidade
est robba de unu mundu pelfessu..
e tando pesso chi s’imperfescione
sola issa siat  beneiscione.
D’Ipocrate si faghet giuramentu
pro dare a sa cusciescia meighina..
abbisumeu menzus testamentu..
de fagher cando lis porris s’ischina.
Dutores chi t'occhint a fogu lentu
S’ atacant comente a s’ erighina..
ebbai che padres meraculosos
cheren istrinas pro porrire gosos..
Sa duda c’apo nadu restat sola
chi gighet a su cabu totu cantos..
chena illusiones e ne bantos
semus in terra una bandarola.
Ilfusta dae lagrim’ e piantos
de nues chena lacanas che ‘olat..
semus in terra chin sa mente presa
de nudda ch’ at una sola zeltesa.
Meraculu pro chie chen’ ispera
dat a su divinu su destinu..
no at in vida un' idea vera
e pessat a su fumu de continu.
Donzi die passada in trallallera
pustis che ruet intro ’e su pontinu..
fuende su reale in veridade
andat in frunda mala ‘e famidade.
In realidade nuddat de pretzisu
‘nenmancu est comente si narat..
sa duda est che bellu sorrisu
de chie isperiat sa vida in cara.
Pesso chi mancu in su paradisu
postu non b’at.. pro chie no l’imparat..
d’essere unu de sa tanta zente
garriga ‘e dubbios chi lean sa mente.
Bos lasso cussa sant’ illusione
chi tantu faghet ben’ isperare..
malaidos chi pessana de sanare
ponzende fatu a una pultascione.
Eo però sigo a dubbitare
meraculos chena una rejone
ca finas Gesus foras dae su tempiu
che ‘ogheit de cummerciu s’ iscempiu.
Finzas a Gesus su dubbiu est bennidu
cando su sole in rughe brujende..
a Babbu Mannu tando l’at pedidu
“proite lu fit abbandonende?”
Niune est in su mundu ’ischidu..
solu presumu est lorumende
no b’at iscientzia.. mancu religione
chi potat dare a duda rejone.
Meraculu est unu, unu zeltu:
sa bennid’ a sa vida in bonora
cand’ a su mundu sos ojos abbeltu..
narat: “ como est bennida s’ora”.
Partit viagiu in destinu inzertu
che Ulisse chi che bessit a fora..
e suberat d’ Ercules sas colonnas
chena tocare pius sas ispundas.
Meraculos de mente ingannadores
sunt sulenu de chie non tocat terra..
pro ilmentigare peleas e dolores
sa veridade in sonnios che serrat.
Finas sos santos padres pedidores
a sos imbonidores faghen gherra
cussos chi de sa virtude issoro
misciant s’abba santa impare a s’oro.
Chi in sa die ‘e cras no b’at zeltesa
lu narat puru su diciu antigu..
Iscientzia at d’ esser’ in pretesa
d’ aer s’ essere umanu pro amigu.
Non bidet cantu l’at sempre ofesa
chin gherras, et miserias a sigu..
pro cantu su progressu siat mannu
ateretantu nd' at fatu de dannu.
In tundu a paraulas girende
torrende a su mantessi logu..
semus che a molente fatende
inghiriende mola dae nou.
No est meraculu su ch’ est bidende
ma brajas chi bessin dae su fogu..
meraculu no est meighina
cando sa linna falat in chejina.
Sa mente mia a s’ammentu andat
Shakespeare chi nos at postu duda
“Est.. o no est ? custa sa dimanda”
Amleto, at una risposta muda.
Ponzedeche donzi pretesa a banda
e cussa boghe chi paret atzuda:
sa veridade in vida .. mai tota
podet esser dae nois connota..
.. e tando menzus chi m’ iste a sa muda
chin surdos e chin zegos faeddende..
lereddos de butega sempre nende
chie la cheret cota chie cruda.
Niune at beridade nuda
caratzas istant totu misurende
in lutu s’ umilesa sunt ponzende..
trista comente zovana fiuda.
No isco su motivu.. su pelchè
diai semus fatos a bistrale..
una die pessamus mancu male
s’ atera pius intreos de su re.
Una tazza de binu pro te
podet esser cue maniantale..
ma si cambias modu .. s' uguale
si peldet sa rejone e su pe’.

Su tempus est bai .. che sa fortuna

Bisonzat de l’ ischire  ponner fatu

Unu pagu  de briu e de tratu

Ocajone de non perder  mancuna

Andende  fatu  a sa bona luna

A su  disizu  ch’ est pius adatu

Si coglit de sa vida cussu ratu

De future  si  coglit una-una.

sa rosa pius galana

sa rosa pius galana

Unu poeta narat a s’ isposa

“proite ses belosa de su versu?”

Issa rispundet: “non so cussa rosa

Chi  pones  in chima ‘e s’ universu”

Ecco chi tando sa manu amorosa

Torrat in segus  e iscriet s’ inversu

“totu sas rosas de custu giardinu

Sunt bellas 'si.. pro  ti fagher s’ inchinu”

Patada (bisura dae s' aera)

Patada (bisura dae s' aera)

Manc' un' istante mi podes fuire
ca sempre ti gito in coro e mente
totue t' ido .. totue presente
finas a note funda in su drommire.
Comente maja 'e ru in fiorire
bianca ses in su birde lughente
donzi fiore .. est sa bella zente
ch' inie restat pro ti costoire.

isteddu 'e soledade

Isteddu in soledade


‘si bella ses.. però non sias trista
Ca gai non t’at fatu sa natura
Tue pares pintada de’ artista
Sias sa menzus rosa .. pius pura
S’ amore chilcas .. ma non l’as in vista
Ca forzis de a isse nd’ as paura
Comente un’ isteddu in firmamentu
Chi solu brillat .. ma no est cuntentu
------------

Stella solitaria

Sei tanto bella.. ma non esser triste
Perché non l’ ha deciso la natura
Tu che sembri fatta dall’ artista
Sei la miglior rosa .. la più pura
L’ amore cerchi.. ma non è in vista
Forse di ciò .. tu ne provi paura
Come una stella in mezzo al firmamento
Che sola brilla.. ma non è contenta

fumu de lanterna

Fumu de lanterna…

Unu filu ‘e lughe in su velone
Si pesat e s’ azendet eterna
Petroliu derivadu dae calvone 
Est in s’ istupinzu ‘e sa lanterna
Dae como a sa concrusione..
Sunt custos elementos de sa terna:
su fogu .. s’ alimentu e s’ aera
si peldent in su fumu de s’ ispera.

ciarrende

ciarrende

A furias de istare critighende
Niune pius t’ intendet o iscultat
Sa zente non b’est bennida o culta
Ca ischit chi nudda lis ses dende
totu su chi as nadu e chi ses nende
est ciarra chi sa beridade ocultat
no s' ischit s' est 'elidone o multa
de zeltu totu si nde sunt riende

sa pica (risposta a su lamentu de Giuseppe Cadau - Pino)

sa Pica

Oh Pino..non ti siat de lamentu
Si s’ arbure ti bucat sa picca
Est solu in cussa palte sicca
Chi issa si b’at fatu s’ aposentu
Pro cando tue ses in ausentu
Inie issa est sempre fica
Rendende cussa binza pius rica
De frutos e un’ ater’ elementu

Sos tocos los faghet in armonia
E dat a sa minda bellu sonu
Mudende totu cantu in allegria
Sos frutos coloridos e a tonu
Impare s’ abba su sol’ e su bentu
Totu musica est in sinfonia

Giuseppe Cadau.

Su bica linna

In bingia mia unu bica linna
ddu at postu sa sua residentzia
s’at seberadu una mat’e olia
sa-e totus prus fort’e picinna
mancari non siaus’a mesania
dda pichiat cun bona custantzia
de dda lassare non s’acinnat
e su truncu istampat e sinnat

Non pagat mancu sa pesone
non ddi potzo prentare isfratu
e non si pedret s’ocasione

proibbidu a ddu pon’in su pratu
apo postu unu mamutzone
ma non timet ne torrat aifatu

illusione politiga

S’ illusione politiga.

No est novidade o meravitza
Chi s’ abe si ch’ imbolat in su mele
O s’ atu ch'in su lardu curret ritza
Pretzisos che a Caiu o Nighele
Sa vida est coa fata a tritza
De benes est piena e de fele.
Solu in sa natura bi nd’ at unu
Chi solu est ladru che mancunu.

Custu de su podere est amante
De isse faghet dillirios et bantu
Narat: “beni chin megus in rejone
E gai ti nd’ ap’ a torrare tantu”.
Politicu maghìa .. illusione
Ma solu un’ iscuta.. pro un’ istante.

fuende

fuende 

^^^^^^
E fuis che fiore in su bentu
Chilchende unu logu a ti pasare
Un’ abe chi ti cheret basare
Ti sighit nessi in su pensamentu
Ma tue non li das cussu cuntentu
Ca cheres sola in nues nadare
Dae totu as pretesa de t’ amare
E chilcas sas ojadas in apentu

Astiu, Abigia, imbidia

Astiu, Abigia, imbidia

Chie cheret passare mala vida
e non connoscher die de lugòre
astiu proat pro 'onzi cosa bida
chena ischire chi s’ agatat s’ amore.
Totu est malu, finas s’ abba ranchìda
passende tempus sempr’ e mal’ umore..
gai che passat siat note che die
chilchende de che ogare s' oju a tie.

Non si faghet mancare s’ abigia
pessende d’ esser de sa terra faru.
Totu li devent che' a maladia..
connoschet solu de isse s’ imbaru.
Su mere paret d’ esser in sa mia,
in donzi logu s’ unicu e raru
inue ponet passu brujat terra
non balet de un’ omine sa perra.

Pustis che finit de fele drommidu..
figàdu e intragnas soltas male..
s’ imbidia isse l’at cossimidu
d’ esser in terra peus animale.
De su tempus passadu e finidu
li restat intr’ e coro temporale..
proite non cumprendet chi pretesa
d’ esser su menzus.. iscurat sa bellesa?

cadderis de Patada

cadderis de Patada

Galanu in su portamentu
chi Deus e natura at dadu
banderas donadas a bentu
colores ch' indeoran su brocadu.
A caddu totu su bellu ant tentu
cadderis de Patada ch' ant bojadu:
In bidda..Bitti o su Redentore.
Tatàri et 'onzi zassu chin onore.