pro chie innamoradu...

pro chie  innamoradu …

..e naschet che a tenneru fiore
in mesu de rueddos  e ispinas.
Sas deas de s’ elosu  in raighinas
li chican de furare  su colore.
Dilig’ unu  sentìdu   o  de  furore
chi falat dae conca  in s’ ischina..
imboligat  su re e sa reina
ponzende   sa corona  a s’ amore.

D’ amore est fatu su mundu
E ligat totu cantu su criadu
A bias isse curret vagabundu
In chie no l’at apreziadu
Ma sempr’ inie lu gighet in tundu
Isetat solu d’ esser invitadu
A ponner passos intr’ e su giannile
De chie at s’ animu gentile

Su sentimentu pius decantadu
Su pius chi est post’ in poesia
Sempre totue est bistadu chilcadu
a s’indonu natura lu daiat
Pro cantu siat isse ilmentigadu
Cando bi fit  coro tocaiat.
Niune lu podet negare
S’ amore  faghet sa mente bolare.

S’ amore no est solu passione
Nen mancu est solu sentimentu
rejone est, materia e pessone
benìdore, presente e ammentu.
A dereta s' amore si ponet
a faca 'e Segnore in firmamentu.
Est  alchida  chi dat a sa vida
sa forz’ e narrer: “l’ap’ inchida”

D’ amore si pienat sa ‘uca
cando no at in coro su reposu.
Gai faghiat sempre padre Luca
pro  dare a isse  pagh’ e gosu.
Totue est presente .. e si  tucat
finas in su pighìdu  iscurosu
No est cosa chi  frimmat sa mente
ma trazat su destinu de sa zente

Totu est gulpa de s’eternu Dante
ch’ at postu in poesia sa trisca:
anìmas duas in ilferru errantes
notas comente Paul’ e Franzisca.
A issos mi paret sembiante
sentidu chi pro isse  totu arriscat.
Sa forza  'e s’ ispad’ e Gabbrielle
“amor che move il sole e l’altre stelle”

S’ amore est chei sa poesia
chi benit.. cando  pasat atesu
presente no est zeltu chi  siat
a bias  forte  s' apparit   azesu
che  braja  in chejina  restat  bia
si furru si munenet  ben’ inchesu
Amore.. amore… amore et amore
Ite bella paraula ………….. amore…!!