intirinende

intirinende

Sa poesia ..amigos est direta
a chie coro abberit a s’aera,
‘ue bi current  frinas de ispera
e coglint totu cantu su ch' isetant.

Cussu colore ruju  ‘e tarda sera
coberit su chelu chena meta..
cando  sa luna 'alu est chieta
finas chi notte manna non s’acerat.

Non lassat dudas a chie l'at in coro
ca bidet  su chi sa natura dada..
s' imbelghet  in  sos bellos sentimentos

chi rendent  melmos friscos e cuntentos.

S' anima  dae sos pesos liberada
torrat sos benes a su logu issoro.

sas rundas de Patada

sas rundas de Patada.


Non ti poto pinghere in mezoru
E mancu ponner vers’ in poesia
Nudda, che te…mancu fotografia
Dat assimizzu a unu chelu in s’ oru.
Milli e pius milli... boghes de unu coru
forsis ti poden dare s’ armonia...
o puru orchestra in dd’ una sinfonia
fagher de te su cuadru sonoru.
Custu manzanu t’apo 'alu miradu
comente faghio in pizzinnia...
su tempus passat
...a tie nudda lassat
restas comente sa menzus poesia.
raida 'e versos.. su coro m' atatas
'alu m'incantas e nde resto ammajadu

caddos multinos Mauro Puddori artista: ( G. Pira .. G. Montesu .. L. Cambiganu)

caddos multinos

Mauro Puddori artista:

"Il mio sogno, scrivere poesie belle come i miei dipinti, o almeno che somiglino un po a quelle bellissime di Peppe Montesu, o quelle di Lussorio Cambiganue quelle di Giovanni Pira, forse un giorno riuscirò, un sogno difficile da realizzarsi, un conto è la pittura e un'altra è la poesia, una faticaccia incredibile, non faticavo così nemmeno quando facevo il tagliapietre.."

Giovanni Pira 

Maureddu poeta ti disizas 

che a Pira, Montesu e Cambiganu.

 Ma su disizu tou no est vanu

 ca poeta ses già, non tind'abizas? 

Ca cando pintas cussas meravizas,

 sa poesia la giughes in manu, 

 ca essin gai bellas e perfetas

 solu si sos pintores sun poetas!...

Peppe Montesu 

Est poesia tottu su chi cantat
E chi aperit sas jannas de chelu
Mauru su chi pintas in su telu
Pius de sas paragulas ispantat
Si e colore sa tela s’ammantat
Intro e coro a tottu dat anelu
Ista sicuru chi est poesia
Chi su prinzellu iscriet ebbia

Lussorio Cambiganu ^^^^^^^^^

De poeta nd’ as s’ animu profundu
Comente de pitzinnu as su coro
Gai penseri tou vagabundu
Curret fatu sas siendas issoro
Sas musas chi chilcas las as in tundu
Chi ti dan cantu pedis pro ristoro
Sias cuntentu de cantu as in pista
Ca tue ses cumpletu.. un’ artista

Bona Pasca de Nadale

chin salude e cuntentu



B - os tio cherrer dare unu fiore
U - nigu, de colores naturales
O - lfanu dae tristu e chena males
N - ebidu che- a su prim’ amore

N - ados in custu modu verticale
A - ugurios chi essin dae core
T - antu bos porro rendende- bos onore
A - totu cantos de Pasc’ e Nadale
L - eadelos comente prenda siat
E - 'onzi ateru bene Deus bos diat.

Pedras chi faeddant

Pedras chi faeddant.. (Pattada.. strada romana di Badu ‘e Crasta) foto di GiorgioMaria Pala.

……. Sa vida sighit semper in  su mundu .. e su mundu semus nois ..‘alu!

Istradas chena cominzu e fine
Chi naschent intro su tempus passadu
Presente .. e su tempus benidore

Passizat subra sas pedras primores .
Nudda .. mai olvidu.. ilmentigadu
sas pedras chi faeddant .. in mudine.

Aecò..!

Aecò..!

Aecò !.. su Bambinu est torradu
a giaru de ojadas ..dae su bisu..
sa terra torrada est paradisu
comente ante omine fit tando.
"Forsis su ninnieddu- mi dimando -
est cussu chi mare at afogadu?"

Eccolo.. è ritornato il Bambino
al chiaro degli sguardi.. dal sogno
la terra ridiventa paradiso
come prima dell' avvento umano.
"Forse il Bambinello - mi chiedo -
è quello che ha affogato il mare?"

S’istadea

S’istadea

Un’istadea dae jau in muru
nd’ apo faladu,
fit frimma de seguru,
finas a cando tue non m’as dadu
musica ‘e ballu allegru a duru duru
e pessamentos malos c’as bogadu;
dae trint’annos de ruinzu falada
impare a cantaru issa fit apicada.

La lee a manu manca o a s’imbessa,
su ganzu .. su pirone e su piatu
paren in tiru che sa lana in tessa,
in ecuilibriu perfetu, che a ratu
de armidda areste e sonu ‘e murighessa
in chida santa o bagna c’apo fatu.
No b’at mamentu chi no iste in taca,
dae cando alenu tou, eo gito a faca.

Pesu e cuntrapesu uguales
torran giustos tribulias e gosos,
in piatu bi ponzo sos juales
a pirone poesia e vessos.
Sas cadenas de numeru sun tres,
d’onzuna mi allevian sos pesos,
cando fadiga o conca a mancu e te
faghet ischentiddare servu e re.

Perfeta sinfonia sonos d’incantu,
coglio su menzus fiore ‘e natura
de amistade tua nde fato vantu,
su passadu e presente tenzo in cura.
Isco chi eo no so eroe ne santu,
si pesso a tie però no b’ at paura
e tiro innanti ischende chi sa vida
mi dat tantu e s’animu m’ischidat.

Mischina zente chi no l’at cumpresu,
si lean pesos de garricos macos,
non lis cumpetit nen totu ne a mesu
pienan de dolores sos lacos.
Fatende finta de abbaidar’ atesu
no biden chi foltuna b’est a sacos
in domo issoro o in s’ighinadu;
pessat su ricu chi siat malefadadu.

E tue meravitza de natura
in grascia ‘e Deus e non li faghes pesu,
cust’istadea torrada a criadura
la pienas d’ ispera in cuntrapesu,
ca sos dolores ti dant vida dura,
sa dignidade paret furru inchesu.
Torrant totu sos contos in vida,
si fuint como, morte cheret timida.

 La stadera

Una stadera dal chiodo sul muro

ho disceso,

era lì di certo

fino a quando tu mi hai dato

musica da ballo allegro a duru duru

e mi hai tolto i cattivi pensieri;

era lì da trent’ anni arrugginita

insieme ad un cantaro era li, appesa.

La prenda con la mano sinistra o al contrario,

il gancio, il peso o il piatto,

sembrano in tiro come la lana in tessitura,

in perfetto equilibrio, come un il rametto

di timo selvatico, o suono delle cicale

nella settimana santa, o nel sugo preparato.

No esiste un momento che non sia in equilibrio,

da quando ho al mio fianco il tuo respiro.

Peso e contra peso sono uguali,

come lo sono le gioie e i dolori,

sul piatto metto le tribolazioni,

nel contra peso i versi della poesia.

Tre sono le catene di numero,

ognuna mi alleggerisce i pesi,

quando la fatica e la testa in tua assenza

fa scintillare sia il servo che  il re

Perfetta sintonia di incantevoli suoni,

raccolgo il più bel fiore della natura,

mi vanto della tua amicizia,

curo sia il passato che il presente.

So di non essere ne eroe ne santo,

se penso a te però non ho paura,

e vado avanti sapendo che la vita

mi da tanto e mi risveglia l’anima.

Poveracci coloro che non lo capiscono,

prendono  pesi di carichi da matti,

pur non necessitandone neanche a metà,

riempiono le vasche di dolori.

Fingendo di guardare lontano,

non vedono che la fortuna riempie i sacchi

a  casa loro o nel vicinato.

Anche il ricco crede di essere un disgraziato.

E tu meraviglia della natura,

sei nelle grazie di Dio, e non gli dai peso,

questa stadera ritornata giovane creatura,

la riempi di speranza nel contra peso,

perché il dolore ti rende dura la vita,

ma la dignità è ardente come un forno acceso.

Tornano tutti i conti in vita,

se scappano adesso, la morte fa paura.

Fiores de Sardigna

Fiores de Sardigna

Ciao .. fiore galanu che mancuna
Atzeta chi ti porre unu penseri
Unu coro istranzu e furisteri 
Chi furat raju ‘e lughe a sa luna.
Comente o proite sa fortuna
No ischit de distinu passitzeri
De cussu chi mirada gai ferit
E betat donz’ ispera totu in d’ una.

Su casu .. sa fortuna e su destinu
M’ at chelfidu donare sa dimora
E tue ses brotadu propiu inoghe
In terra de Sardigna .. bisu e boghe
Su sole chin sa luna a dogn’ ora
Mi paret de los gighere vicinu.

Su bisu de sos amantes.. (pittura di Uccia Spanò)

Su bisu de sos amantes.. (pittura di Uccia Spanò)

Soltos dae sa calura de su fogu
Contende ranos de manos in rena
Sa vista chi umbras bident apena
Nues d’ alenu pienant su logu

Totu paret in gosu.. no est giogu
ca coro e mente leat sa carena
ligados in aneddos de cadena
si peldent in chelos rujos e grogu

s' infinidu e s'orizzonte

s' infinidu e s'orizzonte

Chilcas die chin die
Cuss’ atimu ‘e gosu
Chi solu bides in segus de monte
Gai bido a tie
Coro meravitzosu
Chi s’ ispalghet atesu in s’ orizzonte
Ses nue e ses istella
Chi brillat semper bella
ma gighet dudas zeltas in sa fronte
cando benis a mie
su coro s’ abberit e si nde riet.

undighinas chin Giuseppe Pintore..Salvatore Sini Giovanni Pau Peppe Montesu e Manuel Deiana

undighinas chin Giuseppe Pintore..Salvatore Sini

Giovanni Pau Peppe Montesu e Manuel Deiana 

Est su puntu ‘e vista
Chi est de aconzare
Cando s’ idet male donzi cosa
Chie est arrivista
Si devet frimmare
Prima chi pè che ponzat in sa losa
Chie non li bastat mai
Sighit in arguai
Semper in pensamentu e mai reposat
Forzis pro la gosare
Sa vida bisonzat de la mirare.

Giuseppe Pintore *

Siat domo reale
o siat in pinnetu
s'omine cheret fagher concuista.
S'stintu naturale
no lu lassat chietu
s'animu de ponner in bella vista.
Donni balanzu sou
siat betzu e nou
lu mustrat chi lu tenzat a provista.
culpas de su balanzu
a bias est da sa vida s'istranzu.

Lussorio Cambiganu

Paret bisu licanzu
A su tempus primore
D’ aer in manu e mente donzi cosa
Ma posca de su anzu
Si sentit su dolore
Cando ruet s’ ijone fabulosa
Non esistit conchista
Chena leare pista
Si vida non si bivet e si gosat
Ca est culza abberu
Siat pro ricu o poveru ‘eru

Giuseppe Pintore *

si curret in de badas
sena b'aer importu
dies e nottes passan sena contu.
pagas sun amentadas
chi dadu an cunfortu
is ateras boidas andan a tramontu
ma deo naro custu
no isco chi est zustu
inue est s'insoro torracontu.
Chie nudda imparada
chi no a cumpresu ite narada.

Lussorio Cambiganu

Eo torr’ a s’ ammentu
Cando in pizzinnia
A mama faghio cussa pregunta:
“it’ est su cuntentu
Pro me e s’ anima mia
D’aer dinari semper in aggiunta?
O puru coro tentu
A benes de sa bia
Chi risu mi dant solu una giunta?
“eja fitzu meu
Sias in paghe tua e de Deus”

Giuseppe Pintore *

Chie si cuntentat godit
narat su diciu antigu
chi de su populu est sapientzia.
Su bellu ja si nodit
su feu prus azigu
custu tenz'eo po isperientzia.
Chie pretende tantu
ne risu ne piantu,
lu cuntentat peruna sententzia.
Sighit s'andala sua
e no s'abizat est in sa terra nua.

Lussorio Cambiganu

No est chelu nen terra
Ma solu vana gloria
Cussa d’esser su primu de sa lista
Su coro sempr’ in gherra
Sa mente solu boria
Cussa d’ illusu mere.. et arrivista
Li passat che coete
Sa rima de poete
Chi l’ isperrat su coro e sa vista
Solu sa poesia
Dat bisu e godimentu a fantasia

Giuseppe Pintore *

Carmina no dat pane
ma s'animu serenu
est cando prenetad'in su profundu.
Osselva pius addane
sena limide ne frenu
a contrariu est girende su mundu.
ue musica sonat
is almas abandonat
cue sa zente ballat a ballu tundu.
ca s'arte e poesia
reunit totu s'umana zenia.

Lussorio Cambiganu

Sa Mente Subrafina
De s’ Altu Sagramentu
At dadu umana ispetzia a s’ universu
Cale menzus istrina
De cussu sentimentu
Chi in andalas de mundu como est persu
In gosu e in dolore
Solu don’ e Amore
Faghet bider in nues su chelu tersu
Retorica li naran
Ma solu isse dae su male parat

Giuseppe Pintore *

Cuddu chi totu movet
da s'altu 'e s'empireu
in su triangulu tenet s'oju fissu.
est isse chi promovet
su bene tou e meu
proite solu su bene cheret issu.
po liberu arbitriu
de males unu riu
no cumprendo proite l'at permissu.
Isse bene tratada
chie lu chilcat semper l'agattada.

Lussorio Cambiganu

Si Deus cheret gai
Chi gai siat puru
Ma duda restat in mene custante
Proite s’ arguai
De ruer in s’ iscuru
Isse non lu abbolit in s’ istante?
Forsis est una proa
De su dimoniu coa
Chi faghet de s’ umanu dillirante
At esser una gherra
Tra chelos e inimigos de sa terra

Salvatore Sini ^*^*^*

Custas undighinas
fattas a improvvisu
M'ischidan' sa mente de unu bottu
e chena fagher dannos e abbolottu
a Rino dao cuntentu
ca sempre cun intentu
bideas noas nde 'ogat a pizu
de s'arte mama est babbu e fizu
galu dat isprone
pro sana chistione
E pro unu pagu mi che ponzo in mesu.

Lussorio Cambiganu

Tue Baror’ e Sini
Cantadore de lussu
Cantu sas poesias de s’ intragna
Dae punta ‘e sant’ Aini
Bido de tie cussu
Burgu de idda suta sa muntagna
Chi a mie dat cara
Su monte de Limbara
‘Elchidda inue faghes cucagna
Cantalu a moda tua
Cantu su sole est lughe e umbra cuat

Salvatore Sini

No so che una 'olta
ca como paret morta
sa vena de sas abbas de Limbara
ca dai meda no mi lijat cara
sa musa ispiradora
majalza e traidora
sa cuccagna est dura a la pigare
si no penso s'ozu a che leare
pro no illuscigare
in terra restare
che ainu in terra imbroscinadu
mancu ch'essera appena nadu
intro sa poesia.

Lussorio Cambiganu

Su donu t’ est naschidu
E fatu nd’ as impreu
Ponzende totu cantu in poesia
Su mundu tue as bidu
Como chilcas a Deus
Su Babbu nostru e fitzu de Maria
Tue funte e vena
De poesia e pena
Canta su rusignolu e non s’ istria
Lassa lastima e dolu
E canta sa bellesa e issa solu

Salvatore Sini

Como su rusignolu
no pesat pius bolu
no at pius pumas alas e ne boghe
ma ancora in custu mundu so inoghe
cun sa conca istracca,
cun versos in busciacca
abbutinende su mundu in ue passo
e mancu pius trattas lasso
su chi devia dare
in custa terra andare
dai sempre l'apo dadu cun consolu.

Lussorio Cambiganu

Non ti fatas minore
Non mudes sos discursos
Tantu su ch’ est bistadu est isculpidu
In pedras de s’ onore
E in totu sos cuncursos
Inue as partecipadu e binchìdu
E como a ora tarda
Canta in limba sarda
Cantu in vida as bidu e patidu
Sias semper donosu
In fagher e ponner versu amorosu

Salvatore Sini

De sos onores dados
cun fozitas de laros
in sinu e in su coro los remonzo
cun riguardu in fronte mi los ponzo
che unicu dilettu
balanzadu in su trettu
a contivizu de cust'arte macca
chi a bortas morit e istracca
fuit da-e mente mia
sa cara poesia
Apo a sighire lu creo sos versos caros.

Lussorio Cambiganu

Lu leo che una promissa
Chi siat ben’ afferada
De t’ ider e t’ istringhere sa manu
Est cuss’ idea fissa
De un’ arrejonada
Tra poetas de su gener’ umanu
Non faghet diferentzia
Cal’ est sa presentzia:
Caddura .. Logudoro o Campidanu
Su versu cando curret
A totu sos limbatzos gai sucurret

Giovanni Pau

Postu azis in motu
S'amena poesia
Chi fit dae Limbudu tant'amada
Ma in cust'abbolotu
Sa mia fantasia
Est menzus chi s'abbarret ritirada
Ca inoghe b'est Rinu
Ch'in su sou giardinu
L'an custa poesia cultivada,
E si fag'un'errore
Isse mi torrat minore minore.

Lussorio Cambiganu

E millu a isse puru
Giuanne Pau ‘e Torpè
Chi chilcat de apparer minoreddu
Non ti fatas s’iscuru
Ca tantu aterechè
Ses mannu in poesia .. non poeteddu
Pro cantu s’ umilesa
Siat semper de richesa
Nudda podet furare a su chelveddu
Ca sempre as dadu proa
De non essere a nisciunu a coa

Giovanni Pau *

So insignificante
Finzas troppu mezzanu
E bassu cun sa mea fantasia,
Si f'istadu che Dante
Su poeta toscanu
Bos faghia prus bona cumpanzia
Ma l'isco, so minore,
Ch'est pagu su valore
Chi tenzo faghende poesia
Si mannu fi-istadu
Bos aia de cert'accuntentadu.

Lussorio Cambiganu

e ca l’ insistis gai
naro chi non bi cres
finas si falas in suta ‘e palcu
non l'as ammiter mai
mancu in punta ‘e pes
ma in terra ischis chi as postu malcu
sa tua poesia
no est de chie si siat
ma tantu pesat chi lassat su calcu
gai istas apitu
chi siant isculpidas in granitu

Giovanni Pau

Lassalu su granitu
In su monte limbara
tantu no est a tie disturbende,
Su numen me-iscritu
Pro una mus'avara
Mai lu as'a bider'iscriende.
Si fi'istadu mannu
Sa zente cun affannu
Ja bi la dias bider trivagliende,
Ma ca lu so minore
Niunu nde consumat de suore.

Manuel Deiana

Deo si m avvicinu
Certu non pro niente
Betto su pede passu dopu passi
Gai est de continu
Chi movede sa zente
Tirende fritza in chilch e sorpassu
Eppuru a Los biere
Est cosa de nde riere
A boltas giai mi paret un ispassu
T affossan e ischivana
Eppuru sempre ultimos arrivana

Lussorio Cambiganu

E tue Manueleddu
Ch’ as s’ arte costoida
Proite non la mustras frecuente?
D’ edade minoreddu
Ma de mente limpìda
Podes dare cuntentu a sa zente
Non semus signorinas
Pro te menzus bedrinas
Ma nessi non nos lassas chin niente
Su tempus tue fura
Pro dare a nois gosu.. ch’ est sa cura.

Peppe Montesu

Amigos mios caros
E poetas balentes
Chi s’unnichina in motu azes postu
Sonos arcanos raros
Nos venin a sas mentes
C’ammoddican su coro pius tostu
Appo lettu diversos
De sos rimados versos
C’azzes iscrittu rimadu e cumpostu
Nazzemi in modu cale
Sicchimus custu nostru festivale

Lussorio Cambiganu

Nara Peppe Montesu
Ite mi contas tue
De dies ch’ as passadu in cumpanzia
Eo dae atesu
Comente ch’ esser cue
In s’ idda ‘e coro ch’ est tua e mia
Orune t’at cumpridu
Acoltu e riveridu
Comente tue l’ as dadu lughe bia
Su cantu e su faeddu
A dadu a rimas tuas Pirrigheddu

Peppe Montesu

Pirrighiddu de s’arte
Est sa manna reina
In su cantare no at simizzante
Issa m’at fattu parte
E chin boghe ladina
At incantadu s’Orunesu astante
Una bella serada
Cun versos pienada
Pro chie ‘e poesia n’est amante
Chin su tenore puru
An dadu lughe umbe fit oscuru

Lussorio Cambiganu

Cuntentu nde so tantu
De sa bella serada
Ch’ at dadu boghe a sa roc’ e Nunnale
Su meu rimpiantu
Est in cuss’ abbojada
Ca dae Casteddu m’ est bennidu male
De b’ essere presente
Inie in mesu ‘e zente
E poder gosare che tie uguale
Però nde so cuntentu
Ca intesu bos apo in frina ‘e bentu

Peppe Montesu

Venit s’occasione
Impare de istare
Pro poder menzus faeddare e poesia
Sos versos tue pone
Pro los poder cantare
In’umbe ambos impare amus nadia
Torramus a Orune
Naraliu a Neune
Chi ti det rimas de alta zenia
Cantumus a tenore
Rimas d’ammentu e de patriu amore

Lussorio Cambiganu

Totu cussu valore
Dae Isonzo a Caporetto
Su sambene d’ Orune at dadu proa
Cantu mannu s’ amore
Ap’ in coro.. bi ‘eto
Pro dare lustru a Orune betza e noa
Ca m’est de pitzinnia
Ment’ e anima mia
Chi m’amparat sa vida che’ a doa
E tando est in promissa
Te torrare inie .. pro bantu a Issa

Peppe Montesu

Orune est una mama
De amore e dolore
Chi sos coros nos acchet palpitare
Nos pienat de brama
De fogu e de ardore
Est che bazzana chi cheres amare
Est ardente che fogu
Arcaicu su logu
De usos e de modos singulare
Canno as s’arrastu inie
Istat mutinne in tottue a tie

Lussorio Cambiganu

Est issa cussa rosa
Chi punghet s’ ispina
Ma restat menzus prella de giardinu
De profumos nuscosa
Et abbas cristallinas
Frade e sorre et amigu vicinu
Finas in su difetu
Lu faghet in rispetu
De codices criados in caminu
Comente donzi rosa
Est issa trummentada e delisciosa

Manuel Deiana

Pius tempus dedicare
Amigos bos cheria
Ischides ch appo manna passione
Ca poto imparare
De sa bella poesia
Ch' iscries tue e ateras pessone
Eppuru cando loto
Pro ateru non poto
So impignadu in dogni situazione
Si appo tempu appena
Giai torro in motu custa dote lena

Lussorio Cambiganu

Tenes tue rejone
De currer aterue
Su tempus ti pessighit in s’ edade
Faghe atenzione
A non bi ruer cue
Impita mente e abbilidade
Cando su mele nuscas
Istejache sas muscas
E bivas bene sa realidade
Sa bella gioventura
Ispinghet che su bentu s’ avventura

Peppe Montesu

Sono montes e rocas
Chi signadu an su coro
E in supra an’iscrittu e b’an pintadu
Ventos e thiloccas
Cun su faghere issoro
De onzi fizzu sa fronte an sinnadu
S’unicu panorama
Che sirena acchet giama
Cantas vortas lontanu apo sognadu
luntanu cuss’ammentu
Ti ponet in tristura e in turmentu

Lussorio Cambiganu

Dae punta ‘e sant’ Andria
Sa rughe s’ idet fissa
A car’ e Marrer’ e Tempiesu
Sa mia poesia
De inie paret issa
Comente eo so de issa a mesu
‘alu l’apo presente
Su grabbu de sa zente
Chi naraiat “tue ses orunesu”
Bi restat in s’ ammentu
Cando bi andaio.. e fio cuntentu

Peppe Montesu

Su sambene Orunesu
Pienat de corazzu
E d’amistade ti faghet funtana
Ofennet s’est offesu
no azeta ligazzu
amat sa musa sincera e galana
anima e coro data
e totu su chi ata
no estu veru su chi de nois nana
furat pro balentia
ma de paraula ne atta una ebbia
Torro a caminare
in sa terra predosa
chi apo caticadu in pizinnia
faghet totu ammentare
onzi preda onzi cosa
cuddu chin coro serradu giughia
mi torrana in sa mente
sas voches de sa zente
sas caras frimmas in s’anima mia
como poden essire
umbe si poden su prantu vrobire
e benit su passadu
e mi vio currenne
a pede iscurthu chin cara festosa
su dopo m’at negadu
de sos cantos paschenne
sos dulces sonos de zente amorosa
una lagima falat
e su coro mi narat
lassal’issire non est timorosa
est sinzu e cuntentesa
de s’intragna negada sempre ofesa
Ite vivere arcanu
su chi faghet su coro
canno si ligat che moro in cadena
li est tottu veranu
totu lughet che oro
li paret gaju s’afannu e sa pena
non mirat su presente
afrontat su benente
paret bunnante donzi sica vena
senna su duru anneu
faghet a festa e prenat de recreu

Lussorio Cambiganu

Poetas e dutores
Prideros .. avocados
Politicos e mannos dirigentes
Artistas de valore
Pastores sistemados
In terra ‘e Sardigna e continente
Sa bidda abbandonada
No est ilmentigada
Pro totu ‘alu s’ issor’ ambiente
Andria Chessa e Gattu
S’ onore sou l’an iscritu in atu.