poesia a bolu in palcu (nella foto Giuseppe Porcu Bruno Agus Nicola Farina)

poesia a bolu in palcu ( Giuseppe Porcu Bruno Agus Nicola Farina

it' est chi cantat e li ponet malcu
forsis su coro.. s' anima .. non solu
cussos poetas chi pigan in palcu
e coglin versos leados a bolu?
de zeltu sun .. pro me unu cossolu
chi in sa vida m' at insinzadu s' alcu
dae Cubeddu a tempos de oe
musas cuntentas sun totas e noe

Sabina (Binedda) .. santa amparadora de Patada (29 austu).. sighit moda de Peppe Pintore

SANTA  SABINA

Su vintinoe austu in Patada

si cumprit sa Santa  amparadora,

totu si mudat  sa zente in bonora

pro  li fagher sa festa  isetada.

Sa idda de costumenes  colorat

chin caddos  e  ischiglias in s’istrada,

abbojan dae idda  'e  sa leada

pro la ‘ogar  in pultascione fora.

Sa malture romana  pro sa fide

sighende rivelada  religione,

no at chelfidu intendere rejone

de  lassare a issa pro sa vide.

In s’ Aventinu  tando che la  ponen

pustis   de atire a bidda  si dezidet,

dominiigos  sa pedra deponides

in Santa Rughe de bidda rione.

A manu manca ‘e s’altare mazore

bi ses Tue ch’ isperias  sa zente,

siat  cussa in duda  o credente

totu  abbrazas bidda chin amore.

Onz’ annu su comitadu  presente

a tradiscione  de festa ‘e  folclore,

musica, cantos ..bim-bois a tenore

allegran  sos de ‘idda  e continente.

Nudda però  de bellu in paragone

 a su manzanu   de sa festa manna,

cando  Babbai dae s’oru de sa gianna

beneighet  sas banderas  de rione.

Posca  a sighire b’est sa  missa Manna

a sero  sa devota pultascione,

 fatu sa cavalcada si disponet

isetende che tremida de canna.

Perdonanos   Binedda  si a tie

pedimus  solu ‘oe  in modu giaru:

saludu, trigu  e finas amparu

chena  lu fagher  semper cadadie

Est  in sighidu de gloria 'e laru

chi nos ispinghet de lu dare a chie,

s’ispera de su mundu  chi 'onzi die

si peldet  chilchend’ ateru faru.

Malture cristiana, ses bistada
De su segundu seculu ‘e Cristos
Nobile, fis matrona cojuada
Cando cambiamentos si sunt bistos
Impare chin Serapia cuada
Connotu as mamentos bon’ e tristos
in s’ annu chentuvinti proas sa sorte
de binchere chin sa fide.. sa morte

milli.. ateros milli sun passados
sos annos chi tue in s’ Aventinu
impare chin sos populos restados
pesadu b’as basilica vicinu
sos zestos tuos restan ammentados
inie e in Patada ti so’ ighinu
in die de grascia vintinoe Austu
ti festamus in bidda.. finas custu

Moda a santa Sabina (Peppe Pintore Ortueri)

in sos riones tuos totu unida
apagas sas usantzias e bramas
cun fide devota preghende.
Patada de nou a festa estida
Coronada e cavalleris e damas
sa martire Sabina onorende.

Pagana de nobile areu sende
s'abbratzat a sa fide cristiana
a so faltzos deos che los catzat
pro lu venerare su veru deu.
Pagana sende de nobile areu
s'abbratzat a sa fide cristiana
de nobile areu sende pagana
sa cristiana de fide si abbratzat
a so faltzos deos che los catzat
pro lu venerare su deu veru.
cun Serapia su ritu su misteru
de is catacumbas valat in su situ
su misteru cun Serapia su ritu
in su situ de is catacumbas valat
cun s'ancella sua si signalat
poninde in usu su cultu divinu.

Sende minore isposa a Valentinu
chi fit unu romanu senadore
fiuda leas su rosariu in manu
e sa cristiana rughe difende.
Isposa a Valentinu minore sende
chi fit unu romanu senadore
a Valentinu isposa sende minore
senadore chi fit unu romanu
fiuda leas su rosariu in manu
e difendes cristiana sa rughe.
Che santa cue ti pones in lughe
cun coraggiu fiera ti pianta
cue ti pones in lughe che santa
ti piantas fiera cun coraggiu
sena timire perunu oltragiu
peroe a deus non tenes ocultu.

In so riones........................
poninde in usu su divinu cultu.

A Elpidiu no mustras sussultu
poi chi sa molte tua at detzidiu
afrontas serena sa mala solte
fronte li paras e no t'assustras.
A Elpidiu sussultu no mustras
poi chi sa molte tua a detzidiu
no mustras sussultu a Elpidiu
poi chi detzidiu a tua sa molte
afrontas serena sa mala solte
no t'assustras e li paras fronte
oe reposas in s'aventinu monte
cun Serapia divisu as su destinu
reposas oe in su monte aventinu
su destinu cun Serapia as divisu
cun fide santa in lara su sorrisu
pro sighire s'imprenta 'e Gesusu.

In so riones............................
poninde su divinu cultu in usu.

Faghe Sabina de como in susu
triunfet sa salude in donni domo
cun donni arte e donni virtude
s'armonia si mantenzat sa paghe.
De como in susu Sabina faghe
triunfet sa salude in donni domo
Sabina faghe in susu de como
in doni domo triunfet sa salude
cun donni arte e donni virtude
sa paghe s'armonia si mantenzat
su tempus pius propitziu chi enzat
cantzellande puru s'umanu vitziu
chi enzat su tempus pius propitziu
s'umanu vitziu cantzellande puru
ch'illugoradu siat su futuru
in campagnas tzittades e masone
prosperidade in sas produtzione
cun benessere bundante de continu.
Istende de chelu su bratzu divinu
a s'amigu vagabundu predilettu
chi galu es ligadu a su lettu
est ora chi cussa cadena isolves.
E totu sos probremas li risolves
chi torret vagabundu a pe in terra
intertzedi tue in sa divina serra
no isettes unu minutu a crasa
e grascias infinitas li dasa
ca nde tenet abberu su meritu.
Su saludu meu dae su gregu situ
jompat a bois minores e mannos
chi donni aurora siat pius lughente
cun salude un'abbratzu cara zente
a Sabina festedas a chent'annos.

peppe.

Saludu e vida

Saludu e vida

de sambene restat su coloridu
ca Gesus gai l’at paragonadu
difatis in sa missa est cunsagradu
comente siat dae Corpus bessidu
su vate apenas l’ at nuscadu
de versos solianos l’ at bestidu
Inie totu che paret finidu
su sole, terra e donzi criadu

binu..!! lutias alu de suore
d’ isetos e de nues tempestosas
in mesa, solu cando ses presente

b’at paghe e cuncoldia tra sa zente
saludu !! chena falzu, e mancu prosas
in laras.. chel’ e ‘ucca.. su sabore.

s' amore traitu (l' amore tradito)

s' amore traitu

Manzanu.. cando ti ses ischidada

Cal’ est  su primu   pensamentu?

Innanti a s’ ispiju ses andada

A bider si  fit sonniu o ammentu

Luego .. già a sa prima mirada

In coro unu tocheddu asa tentu

“naschida  dae nou  ti parias

E  bolos de ispera ti faghias”

Sos nodos  non s’ imprenden a sa sola

Finas chi su dolore restat biu

Ma totu chin su tempus si che colat

Comente s’ abba faghet in su riu

Sa vida est  gai.. est chei sa mola

Como est gai.. luego no est pius

E tando.. torra innanti  a caminare

Ca  longu su caminu b’ est de fagher.

l' amore tradito

Stamane quando ti sei svegliata

Qual’ è stato il primo pensiero?

Sei andata davanti allo specchio

Per vedere se si trattasse di sogno o ricordo

Presto.. al  primo sguardo

Hai sentito un battito di cuore:

“sembravi nata di nuovo

Ed iniziavi voli della speranza”

I nodi non si slacciano da soli

Finchè il dolore resta vivo

Ma tutto con il tempo passa via

Come l’ acqua che scorre nel fiume

La vita è così.. come una  pietra molaria

Ora è così.. presto non lo è più

Dunque riprendi a camminare

Perché hai un lungo cammino da fare

Pintura mai pintada

Pintura mai pintada..

Un' aidu s’abberit in sas rocas,
dend’ a su mare un’ iscampiada,
istrintu che tuju 'e brocas
a s' acerada restas ispantada.
Paret chi s’orizonte guasi tocas,
e abbrazas su ch’ ides a s' ojada.
comente una pintura mai pinta:
chi s’omine no l’at alu binta.”

Sas rocas isculpidas a carignos
de' bentu chi sulat a maistru,
paren d’umanidade cussos signos:
dolores chi pienan su registru,
fatu chin disaogu e impignos
da’ intelletu mannu e meda abbistu.
sa manu dilìga 'e sa natura
at fatu custa bella pintura.

Totu abbojan cussos elementos
chi sun de vida forza e amore:
sa roca, s’abba e sos pensamentos,
su nibberu antigu e su dolore.
Sa rena.. movida dae sos bentos,
faghet giogos chi torran a minore,
signos de vida sun: galana e dura,
costas de mare de s’alta Caddura.

tempos bonos

tempos bonos

Suave costa sarda corallina
Canta nd’ as bidu de zente passende?
Cando in mes’ e mare, tue rejna
Totu iscabiddados saludende
Benian chin in manu sas istrinas
de saludos e de rispetu dende 
in cambiu pedende fin sa paghe
a su populu mannu ‘e su nuraghe.

Det esser gai, comente l’ apo nada
Cuss’ era de inzegnu e de misteriu
No b’ at proa .. ma eo la bido gai

Su tempus bonu chi no passat mai

Ilmentigo su populu miseru
Chi de Sardigna.. su coro non b’ ada.

santu Lussulzu (san Lussorio)

Santu Lussulzu (San Lussorio)


Lussurgiu sas ispadas at leadu
pro dare forza a s’imperu romanu,
dae Casteddu Segnore l’at giamadu
pro li dare sa fide cristianu.
Sas glorias e cumandos ch’at ‘etadu
e s’ evanzeliu at leadu in manu,
pro custu zestu de alta dignidade
Roma l’at postu in disamistade.
Nudda, pro Isse b’at piedade
lu pessighin in tota sa Sardigna,
'onzi mineta pro isse indebade
sighende sempre s’astru chi lu signat,
a totu nende su coro istade
pro una religione gai digna.
Cando sa fide obbligu l’imponet
no timet disterru nen presone.
Brincadu at sas lacanas de fora
dae Casteddu e su Campidanu,
innanti a Bithia posca Sulci e a Nora
preghende sempre chin su coro in manu.
In Cornus, Neapolis in bonora
at cunvintu populu profanu,
poi in Romana connotu su cunfinu
in Fordongianus bochidu l’an mischinu.
In donzi logu nois l’amus vicinu
e meda zassos bi restat s’ ammentu:
Ceraxius, Sant' Idu l’an ‘ighinu
Uliana, in Corrase e Gennargentu.
Totue chejas puntirinan terrinu
Santulussurgiu nde pesat cumbentu.
Custa sa vida de santu Lussorio
chi eo prego finas chi non morio.

umile dischente

umile dischente

Intantu chi su passu est illonghende
Sa meta paret semper pius aculzu
Niune tenet de issa su bulzu
Pro cantu su seguru istet ponzende
De bider lidos ateros pessende
Innanti de fagher su primu ilmulzu
Posca s’ abbizat de su tempus culzu
Dae como.. a cando fit arveschende

Illusos sos principes e sos re
D’esser et aer bisu onnipotente
De poder chimas altas iscalare

Finas sa vida eterna conchistare
Solu s’ umile poveru dischente
Fra totus .. est cussu menzus de te.

istella de Orune (foto tratta dal social "Ammentos de Orune")

Istella d’ Orune (foto del social "Ammentos de Orune")

It’ est d’ Orune sa bellesa?
Si non cussu palpitu de coro
Chi ti faghet ‘istare in atesa
Prima de iscoberrer su tesoro
Est s’ animu nobìle in gentilesa
Chi brillat donz’ istante chei s’ oro
Est fiore brotadu in su gerrile
Comente chi siat in beranile

S’ isciallu chi coberit sos pilos
de seda pius lebìa non b’at
A issos muntenet costoidos
Comente orofinu non s’ agatat.
Gai sos sentidos remonidos
In femina chi donat e dat
Est custa d’ Orune menzus prella
Lughìda che abba e noa istella.

Rubarono il gregge al pastore con la figlia malata. "La solidarietà? Solo a parole"

Pastore !!..si lu ses muntene a issa
Paraula est comente s’ Evanzeliu
Non boltes palas.. non dies melediu
A cantu prima nd’ as fatu promissa
A su male .. mai la dies bissa
Subera donzi lacana de impediu
Si ses omine beru.. mustra e giura
E pone manu a sa paradura

S’ Assunta

S’ Assunta

Pro mesaustu in sinnu de Maria
Mi ponzo e mi fato sa pregunta:
“it’ est chi nos insinzat sa ghia
D’ esser leada in paradisu Assunta?”
Issa chi già Immaculada fiat
Virzine dae su Signore ‘Unta.
“Ite bisonzu aiat de mustrare
D’ esser diciosa in gloria de intrare?”

Mai nos damus sa risposta sua
Si mai la cherimus inzeltare:
rejone non bi podet arrivire
s’ in fide non ti cheres atrivire.
Maria non mustrat lughe de Gloria
Ma de bene sa forza ‘e sa Vittoria.

cuss' atimu

Cuss' atimu

Meda l’ as lastimadu e piantu
S’ amore de Nina, mai bastante
Fogu ‘e passione chi pro tantu
Ti leat in su coro donz’ istante
Cuss' arte chi tue faghes ispantu
In versu de bellesa tremidante
Comente la coglis dae su dolore
che cambu ismuzzurradu dae fiore.

Leas fungutu dae su sentimentu

su chi semper t’ at dadu dol’ e gosu

De  anima su menzus alimentu

in vida  e in s' eternu riposu.

Forza  ti  dat in su patimentu

'Alu de issa  ses mere  belosu.

Cuss’ atimu  de  forte intensidade

Chi frimmas  in tempos d’ eternidade.

s' incantu

s' incantu

s' artista  t'at pintadu sa frigura
colores dae chelu at impitadu
pro ojos unu oceanu t' at dadu
e sole pro ti lugher sa bellura
sas laras dae su fogu sa calura
sos pilos a pinzellu at ispizzadu
sa cara in pedra dura 'e su rubinu
ismeraldu e zafiru vicinu.

Comente ti si diat dever ‘asare.. dae ( come ti si dovrebbe baciare di Erich Fried)

Comente  ti si diat dever  ‘asare

De Erich Fried

Cando ti ‘aso

Non est solu sa ‘uca tua

Non est solu s’ imbiligu tou

Non est solu  sa mata

Chi  t’ aso.

Eo ti ‘aso  finas sas dimandas

E sos disizos tuos

Baso  sos pensamentos

E sas dudas tuas

Su  coragiu

E s’ amore chi as pro me

Sa libertade tua dae a mie

Su pè tou

Chi est bennidu finas inoghe

E chi si nd’ andat dae nou

Eo baso a tie

Diai.. comente ses

E comente as at esser

Cras et pustis

E cando su tempus meus at esser passadu.

Mascaras pintadas (pittura di Cici Peis)

Mascaras pintadas (pitture di Cici Peis)

Millas !! totu presente e imbidriulidas

Sas mascaras.. caratzas et biseras
Dae biddas aculzu e furisteras
Pro si ponner in mustra sun bennidas
Sa prima chi pinzellu l’at coglida
Est cussa cana de s’ Issohadore
In fatu a sa mastruca ‘e Mamuthone
Bisera antiga niedda che titone.

A faca sos Merdules de Otzana
Impare a sos Boes assogados
Sighit in corrutu Filonzana
Sos Thurpos a paja sun agiobados
Chin s’ Eritaju dae Oroteddi dana
Sos gosos e dolos malassortados
S’ allegra truma de sos Tumbarinos
Passat Cumponidori e sos bighinos.

Sighin mascaras de carrasegare
Caratzas sun abberu unu fiotu
Incorniciadas si cherene totu
Pro si poder a su mundu mustrare
S’ artista ischit cale ischirriare:
Sa maschera chi pius l‘ est de notu
Cussa chi menzus cuat a su mundu
Misteriu et sentidu profundu.


Maschere dipinte 
Eccole!! Tutte presenti ed eccitate
Le maschere.. maschere e maschere
Dei villaggi vicini e forestieri
Per mettersi in mostra son venute
La prima che ha raccolto il pennello
È quella bianca dell’ Issohadore
Appresso alla pellaccia del Mamuthone
Maschera antica nera come un tizzone.
A fianco i Merdules di Ottana
Allaciati Insieme ai Boes 
Segue nel suo lutto la Filonzana
I Thurpos fan paio nel giogo
E con l’ Eritaju da Orotelli portano
Gioie.. e dolori degli storpi.
L’ allegra compagnia dei Tumbarinos
Davanti al Componidori ed i vicini.
Seguono le maschere del carnevale
Che son davvero una frotta .
Tutte vorrebbero incorniciarsi 
Per potersi mostrare al mondo.
L’ artista sa quale scegliere:
la maschera che più gi è vicina
è quella che meglio nasconde al mondo
il mistero ed il sentimento profondo.