biver in poesia Lussorio Cambiganu - Paola Black (Nieddu) e Giuseppe (Peppe) Pintore

biver in poesia  (Lussorio Cambiganu)  Paula Black (Nieddu) Giuseppe (Peppe) Pintore.

Lussorio Cambiganu (Rino)

No apo depidu de cumprumissu
Chi potat su sonnu allebiare
Bivo chena pedire su pelmissu
Ca nudda devo .. ne mi deven dare
S’ ilbagliu semper eo l’apo ammissu
E semper l’apo devidu pagare
Nudda pedo .. innanti ando ‘eretu
A totu alcio cara e do rispetu.

L’ ischides so amante in poesia
De totu su chi Deus at criadu
De s’ omine virtudes e difetos
De femina bellesa e sos diletos
Una cosa però no apo azetadu
De Giuda su pecadu.. 'e ipocrisia.


Paola Black (Nieddu)

ant'est bell'in sa cussentzia netta
a los tenner che fioridos sartos
ammentos, pessos e sentidos artos
chi donzi sensu cue si diletta',
totu paret retzit e chi atzetta'
a s'infinidu sos ojos ispartos
e de sa mente arcanos cumpartos
s'iscanzan che curpidos da' saetta...

...Est tando chi su giaru orizzonte 
su mund'iscunfinadu lu disvela'
s'avreschida ti si parat in fronte,

e tue chi la miras cussa tela
no times mancu s'ira de Caronte
ca pintas tue portu, mar' e vela..


Giuseppe(Peppe) Pintore

Ue olat sa libertade pura e neta
su sentidu nd'isvelat sos arcanos.
Mirat su monte mirat sos pianos
cando usat rispetu si rispeta.
Cantu est incumpletu si cumpleta
paret jompet cun fadada manos.
Proite solu cun sentido sanos
nd'olvidat so difetos chi difeta.

Su modellu est s'animu gentile
cando s'essentzia si nde mustrada
lassende a un'ala su tratu vile.

S'omine chi nd'apretziat sa bellura
in subrimados campos illustrada
s'arte gloria e fama imperitura.