Chie t'at irrocadu?

Chie t’at irrocadu?  (sa Crabarissa  monumentu naturale de Austis)

So sardu.. ma unu pagu milanesu

degh’ annos b’ apo fatu pro tribagliu..
innanti duos annos cuneesu

e ateros postos pro ilbagliu.
In totu bindigh’ annos fora via
a pustis b’apo dadu unu tagliu

torrende a pistare in terra mia
garreras e sa conca a su muru.
Paret su mundu ch’ andet a chilvia

e su modde diventat pius duru..
francu su chi natura at donadu
fin’ issa cheret interessos puru.

Chi’ est chi totu at ilbagliadu..
chena nde dare contu ne rejone?
Totu naran s’ Italia Istadu

eo “pius Sardigna Regione”.
Sos campos laorados chi bi fini
sun como solu arados dae sirvone..

sas manos chi sos zappos leaini
non intran pius in terr’ e aronzu.
Illongan pro coglire cantu pedìni

leadas dae isetos de bisonzu...
teracas de su tempus e destinu
chi paret sempre contra e mai aconzu.

Sos ojos che bogan a su ‘ighinu
cando d’ esser divesciu nde dat proa..
si benit su romanu .. a su pidinu

li curren.. inter ancas sa coa...
che cane fustigadu dae su mere
romasu isetat a promissa noa.

“Ti do un’ abbissina pro muzere”
Accò custa proposta manna:
“sa menzus de sa terra at essère

tennera che in beranu canna...
chena pedire nudda .. solu dare”.
E posca pro bos difender sa gianna

bos dono una base militare..
a modu de l'impitare puru
comente magasinu nucleare.

Pro limba bos nde peso su muru
chi potat su connotu olvidare..
su sardu est dialetu puru

sa limba ‘e Dante est de imparare.
Custu bos do .. et ecco sa promissa
nudda bos pedo.. solu ‘e mi votare.”

Su sardu comente sa crabarissa
iscultat .. frimmu restat apedradu
annuit .. e totu li dat bissa

cuntentu.. corrudu e mazziadu.
Onoratos..Rovellis ateros peri
paret chi calecunu at irrocadu.

Vint’annos in Cuartu .. paret deris
e sempre bene mi so agatadu..
finas si mi lean pro furisteri.