“In sardu iscrio, in sa limba imparada dae totu chena mastru in pitzinnia; in conca mia restadu non bi ada ne latina ne ìtala poesia, si in cussas limbas l’ aere ìmpastada mi diant aer nadu chi no est mia. Coment’ isco faeddo.. accolla nada però est cosa mia et non furada” Padre Luca Cubeddu .. dae "sa Cantone de sos sardos"
lunedì 9 marzo 2015
In visita a sos mannos de sa poesia sarda
In visita a sos mannos de sa poesia sarda
In alas de poesia so pigadu
a bider ite faghen sos mazores,
ap’idu a santu Pedru chin sos padres
de poesia mannos e minores.
A una faca bi fit, chin sos frades,
acumpanzadu a boghe 'e tenores,
Pepe Mereu in tundu 'e sos cabales
Nanneddu meu, dae cantu leadu.
Ispantu mannu apenas l’ap' ojadu
de Macumere su mannu cantadore,
tiu Melchiorre de limba chena frenu
at passadu una vid ‘e dolore.
E como chi s’ammentan de Murenu
sos paesanos si nde faghen onore,
a mie cussu zegu dat sulenu
in coro paret, mi siat intradu.
Apenas in dae segus cuadu
iscampio sa frigura ‘e Paulicu,
pur' isse de ‘Onolva chin onore
at impitadu siat fiore che picu.
De Mossa, Gisella in su dolore
restan sas rimas e su cantu anticu,
de rosas e de Flora cuss'amore
cando l’ ap’ idu mi so iscabiddadu.
Remundu ‘e 'Iddanoa assupridu
frisc’ est s’ammentu de sa poesia,
in palcu o puru fata a sa sola
sempre chin grabbu 'onu et armonia.
Pro totu est bistadu un’ iscola
tiu Piras no b’at apidu una ‘ia,
dae subr' a basciu, dae Bosa a Siniscola
chi gara apat mai peldidu.
At unu tratu un’ oghe apo sentidu,
chi de sa mia no fit in assimizu,
Baingiu Pes chin bogh 'e Caddura
mi narat “beni innoghe meu fizu”.
Impare a Lobina isse durat
su mannu de sas limbas in aizu,
issos sa terr' issoro an tent' in cura
in Sardigna e totue an batidu.
Poi una chedda ‘e mannos apo ‘idu:
Pirastru, Antoni Mura ‘e Silanos,
impare a Cubeddu otieresu
e Pedru Casu totu pili canos.
Bachis Falconi ..mischinu fonnesu
Sassu e Fanzellu, sonetos galanos..
a coro totu notas c' apo presu,
posca c’ apo lassadu cussu nidu.
Totu giamadu a segus ap’ ischidu
e Dessanay intender mi cheriat
pro falare cumandos a sa terra
e calchi novidade mi pediat.
Subra sa paghe e subra e sa gherra
aldados dae sas musas issos sian,
menzus de no ischire ite ch’ imperrat
unu mundu ‘e fagher aultidu.
A Seu chin Pazzola l'ap' idu
in gara paris fin a Pepe Sozu
de Masala e Zizi una pregunta
l' apo respostu "lisciu che-i s' ozu"
cantat ancora chin sa limba 'unta
de' cussos versos chi nos dan apozu
ma de sos noos b'at pag' agiunta
ca poesi' e palcu est in olvidu.
A versos de Isili non fuidu
in dulche poesia ‘e Pedru Mura,
sos cantos de Orune mi consolan
dae totue musica b’ addurat.
Cantos in re in sa chiterra bolan
Contene chin Morete a gara pura
e Poddighe 'e Dualche issos giogan
de me paren meda apen ischidu.
In fatu Araolla m’at sighidu
a fac' e Innaziu Mannu ‘e Otieri
cantende “barones sa tirannia”.
e Montanaru de Desulu canteri,.
de Bitti Diegu Mele e Dore idia,
Remunu ‘e Locu, Tuccone ja b’aderit,
chin Franzischinu, Foricu a bia-ia
totu saludo e los ap’ in sentidu.
In sa ‘essida de furesi ‘estidu
ap’ idu cara nota e meda chita,
dae pagos annos est chi no biverat
cussu bonomin ‘e poeta Palita,
a segus Cambone chin Cocera,
Ciddoi, Caltapedde, Sini Monzita,
Moro, Mazza, Alcadu poi s’acerat
' onzi patadesu est assupridu.
Ma su disizu meu no fit cumpridu
mancait Ogana e sos zigantes,
Limbori mi los porrit a sa buca
ecco chi mi aparian sos Dantes:
prima Pesuciu luego Padre Luca
innanti 'e totu de issos sos fantes,
luego a faca Limbudu si tucat
in su viagiu 'e Parnasu giompidu.
Iscriviti a:
Commenti sul post (Atom)
Nessun commento:
Posta un commento