Su tratu ‘e s’anima
Cando coglio paraulas de' su ‘entu
e las isterro in dulche poesia,
no iscriet sa conca, ma sa lebia anima mia
chi apo a coro tentu.
Sunu mamentos chi no b’at maja
che curro chin sa mente a Gennargentu,
no isco in cale modu ne s’ammentu,
fat’ istat chi cue subra mi peldia.
M’ aparin sos calancos chi Larentu
nde faghet arte chin sa fotografia,
ischit leare dae sa mente mia
comente sos segretos de aposentu.
Impare cussos verbos de altura
cosimus in d’una beste ‘e pannu,
sas bellas cosas chi dae ocannu
amus a fagher chin massima cura.
A totu las donamus chen’ ingannu
a sola moda 'e giusta gosura,
impare a zente de bon’ hermosura
intramus pro cumbatere s’afannu.
Diai fatas a bona saura
sas ideas no faghen mai dannu,
comente sempre in di' e cabuannu
auguramus bona congiuntura.
Bellos amigos apo connotu a beru
in custa balla ‘e iscatula sezida,
ido chi zente meda c’at sedida
de poesia , chi mi leat a seru.
M’ammento chi sa prima ch’ap’ estida
fit in ojos de piantu pro interu,
ma ite bella!! e lu naro sinzeru
est sa perla pius prejada 'essida.
Dae cando in sa conca pro imperu
apo chilcadu de biver chida-chida,
sa vana gloria s'iscura l’apo ochida
in su ritratu e m’abbaido su veru.
Bido s’astore chi 'olat pasende
alas a chelu paren a mancu ‘e pesu,
poi che raju a punta fica istesu
s’imbelghet che su ‘entu sulende.
Gai s’animu meu ben’ intesu
in paghe e in disizos pasculende,
a bias in fatu ‘e s’ ae ch’ est bolende
si puntat terpe e la leat a pesu.
Est de s’animu bonu in cuntrapesu
cando dimonios male sun fatende,
isse in difesa ‘e giustu ch’ est falende,
pro su sulenu o nessi pro su mesu.
Forsis una zitade so chilchende
chi no esistit ...si no in coro ‘e Jesù
ma mi cossolo de su chi apo apresu
chi bene est bene... e isse so cantende.!!
