Zente sarda
Bennid’ est s’ora de nde faeddare
Si semus populu ‘e bona carena,
o puru nos si pijat sa piena
de cussu riu ch’ est pro iscasciare.
Seculos medas passados in pena
isperiende zente dae mare,
chi fatu ‘e s’insoro navigare
amus peldidu totu in donz’ ilmena.
Semus o no , de antigu connotu
fatu 'e tribulias e ingannos??
Si dae fora isetamus sos dannos
amus a pelder su destinu totu.
Cand' est chi samunamus pannos
in abbas chi coglimus a fiotu,
pulimus issos dae su corrutu
ch’ intristit sa Sardigna dae annos.?
‘Ue che sun finidas sas ideas
de una terra antiga in mes’ e mare,
chi paret fat’ aposta pro istare
insula ‘e sole e chena peleas?
Tio cherrer un’ iscut’ ammentare
sos sacrifizios e sas cosas feas,
sas inzustiscias e totu sas begas
chi amus bidu semper dominare.
Como est ora de nde la finire:
Sas lanas, sas chimeras chena fine,
bijones chena cabu e su machine
chi prim ‘e nascher cheren aultire.
Truncamus sas cadenas de mudine
ca dignidade devet fiorire,
mai s’ acunortu devimus pedire
chin sa “O” manna giamamus s’ Omìne.
Naro: “ a fora totu zente indigna”
dae su podere ch' at fatu sa colza,
ch’ idet sol’ una manigadolza
cumone fatu tota sa Sardigna.
Leamuche sa caus’ e s’ilgonza
e su malcu chi male ‘alu nos signat,
gia dimustradu at cando s’impignat
chi finas ’arriu in caminu s’aconzat.
