Doighi rosas..
In punzu unu matule de rosas
coglidas dae campos traessados,
una dozina chin foz' e ispinas
divescias, de colores atonados.
in coro tenzo pro fagher istrinas
a totu sos chi apo sempr' amados.
Sun bellas, friscas , solu unu colore
aunit issas.. sa camba ‘e fiore.
Sa prima chi passo a cumbidare
est sa bianca, candida che nie,
ca prima in lista est de ammentare
cussa ch’at dadu lughe 'e vida a mie.
Biaita che zaffiru apo a dare
a sa natura, a mare e su nie,
in vida m’at imparad’ amare
'onzi elementu chi amus a ’istare.
Sa terza chi ater' apo a porrire
est sa giucunda groga giovanile,
che a su sole o luna in fiorire
lughet a fiza mia in cumpostile.
Sae bator est su bonu 'estire
sas cumpanzias de s’era ajanile,
bonos ammentos pienan sa mata
cussu fiore est colore ’e prata.
In fatu una rosa canarina
imbio a sos chi biven in chelu,
totu prezisos sun como in bedrina
lis mando unu asu chin s’anghelu.
Pustis che sighit un’ alabastrina
in punta ‘e pé , e chin friscu s’istelu,
la ponzo in d’unu vasu indeoradu
pro sos de domo chi m’an sempr' amadu.
Una colore 'e rosa che sa peta
la do a chie vida at unoradu,
no at timidu peruna mineta
sun cussos chi esempiu m’an dadu.
Colore ‘e lutu chi mancu s'isetat
la do a sa cultura de Istadu,
ca la impitan a mala saura
timende chi su podere lis furat.
Una bella virzine ismeraldina
coglida in unore ‘e sa bellesa,
pro totu criaduras est ladina
in mannos meda est sa pretesa.
Sae deghe la passo a sa mudina
timende chi mi potat esser resa,
colore no est malu su marrone
pro sa custascia in vera opinione.
A sa fide, remonzo chin s'isetu
isperas de perdonu in mancamentu,
colore est trasparente 'eretu
che Babbu Mannu in su Sagramentu.
In finis so restadu in manos netu
chin s’ultima chi 'alet pro chentu,
l’ arribbo pro s’amore de una vida
sa pius bella rosa mai bida.
Nessun commento:
Posta un commento