iscampiende ammentos

iscampiende ammentos

Pustis d’ aer su riu atraessadu

Brinchende dae nodu a pedra lada
Tra bolos altos e calchi istrumpada
Abbelzo s’ isperaglia a su passadu:
Ammento cando 'alu chitulanu
de vida chi non fit bida nen nada
gioghende.. totu fit a s’ ispessada
imbentos..e mundu gighio in manu.

Currende fatu s’ ae e sos bentos
Pariat de los poder dominare
Aculzu già prima de los giamare
Fin totu: sos disizos et cuntentos
Mai a cumpanzia sos lamentos
Pedio de mi benner agatare
Ischio chi fit menzus isetare
D’ ispender siat tempus che talentos.

Ma cantu in cussu tempus fit diciosa
S’ andera de sa vida fetiana
Si pagu abberio sa ventana
D’ aera frisca..e tantu donosa
Sos nuscos e colores de sa rosa
Cuss’ abba frisca dae sa funtana
Sos frutos chi sos arbores nos dana..
Totu bi fit cue.. meravitzosa !!