Sa richesa (S.Sini) sa bellesa (L.Cambiganu), s’ intelletu Emma Cubeddu).... Giuseppe Pintore e Paola Black

Sa richesa (S.Sini) sa bellesa (L.Cambiganu), s’ intelletu Emma Cubeddu).... Giuseppe Pintore e Paola Black..Francesco Canova


Salvatore sini

Deo so sa subrime in donz'impresa
pro cantu 'enit in terra oberadu
e de sa terra pro cantu est istesa,
'eo possedo onz'essere criadu
c'ap'apidu in dote sa ricchesa
nudd'ateru apo mai disizadu,
cantu c'at oberadu e oberare
tot'est su meu in terra chelu e mare

Emma Cubeddu

no isco si bi potto dare affrontu
a custu tema de grandu importanzia
ma de seguru non cherzo esser tontu
cherzo cumprender donnia sustanzia
in vida fagher bene donzi contu
s'inteligente bide sa mancanzia
e si bi potto istare a sa presenzia
leo sa parte de s'inteligenzia .

Lussorio Cambiganu

Eo isposo subitu bellesa
Chi allegrat su coro e s’ojada
De l’aer intr’ e me no apo pretesa
Ma meda nd’ ido abelta e cuada
Bella sa passione ch’ est azesa
In femina chi s’est innamorada
Bella sa rosa frisca e purpurina
Chi movet su coro a signorina

Salvatore Sini

Cant'in su mundu esisti in materia
cant'in sa terra cant'in sa marina
s'Italia, sa Frantza e s'Iberia
Cun tota s'Europa e i sa Cina
su Giappone sa Russia e Siberia,
sas bellesas d'Egittu e Palestina.
Insomma cant'at fattu mundu e Deu
tot'appartenit a su regnu meu:-

Lussorio Cambiganu

Su regnu tou est solu possessu
Chi no d’at arte emmancu simpatia
Est vida tolta lead’ a su revessu
Fata de ingannu e de bramosia
No bides como ite est suzessu
Su mundu est andende in tegadia
Pro gulpa de s’inari prepotente
Morzende est de famine sa zente

Salvatore Sini

Nde so cunvintu e già mi dat dolore
ma so, e mi presento a cara franca
ca apo meighina e professore
e pretendentes a dresta e a manca
so de totu su mundu imperadore,
dinaris in busciacca e in sa banca
a faccia franca mi fatto servire
e donz'unu est dispostu a m'ubbidire!!!

Emma Cubeddu
*
ma ita faghes tue cun s'errichesa ?
senza s'inteligenzia a la gestire
troppu manna asa a tenne custa impresa
e rischias tottugantu a la perdire
cale chelveddu senza inteligenzia
non bà bellesa o rica chi pode lenire
ma su chelveddu bonu intelivente
tottu risolvede e perfettamente .

Lussorio Cambiganu

Bellesa no si podet comporare
Est intr’ e coro e de mente sana
Pro cantu la podes accumulare
Restat cuada intro de sa tana
Eo imbeze mi poto mustrare
In donzi idda aculzu e luntana
Ca in passizu ammirana ammie
Niune dat cussideru a tie

Salvatore Sini

So puru bellu e no mi dias rimproveru
de me cun su disizu algumentada,
s'omine in sa terra naschet poveru
e li do 'eo tant'alimentada
'eo li do in sa terra ricoveru
cun sa ricchesa bene fratzionada
no so aggantzadu e batto a giompimentu
s'est poveru i do su nutrimentu.-

Lussorio Cambiganu

S’ est beru chi ses intelligente
No podes istare a mancu ‘e me
Ca chen’ ammmie no asa niente
De regnu chi no esistit ses su re
Bellesa est richiesa de sa mente
Sinò s’itelligenza ch’ est in pè
Su mundu at valore cando bellu
Est de sa vida veru grimaldellu

Emma Cubeddu
*
cun sa bellesa non si faghe niente
sa troppu bella cascada in vanidade
este in confusione solamente
curpa e sos cumplimentoso in cantidade
si pagu bi raggionada cun sa mente
èr rovinadu dae sa malvagidade
ecco ca lompe s'erricu cun promissa
e in su dannu bella i finid'issa .

Salvatore Sini

Sa bellesano est un'inventzione
ite ti 'alet si ses bellu o feu
e s'abbistura de fortes pessones
si no possedin custu regnu meu
pro chi de donos apan milliones
ca de manch'unu nde faghet impreu
no so feu ..e de b ellas so mere
e s'intelletu e forza ap'in podere.-

Lussorio Cambiganu

In veridade ambos sezis su visciu
Pienos e abbois e superbia
Sezis chin su dimoni’ ammisciu
Comente cuddu capu de sa Serbia
Pessades chi bos siat totu lisciu
Bos inchet su presumu e sa proterbia
Ma de sa vida no coglides gosu
Ca su sentidu tenides a reposu

Emma Cubeddu
*
su mundu èr bellu e ti do sa raione
prite s'inteligenzia l'ha costruidu
tottu l'ha fattu cun attenzione
e pro sos io èr su bonu servidu
lassa su bellu de sal nazione
e inoghe sa richesa ha contribuidu
però sas concar macas de sa terra
meda han distruttu faghinde guerra .

Salvatore Sini

Emma pessona abbista 'efide intrea
dai s'ora chi lughe 'idu ada
no l'agattan in atera idea
che a fagher ricchesa ostinada
mancari riccu siat persona feu
no mirat nudda, cantu tenet dada
cand'at abilidade bi l'impiegada
pro sa ricchesa a Satana s'intregada.

Lussorio Cambiganu

Sas bombas at fatu s’intelletu
S’inari l’as at compradas
bellesa nd’ azis fatu dispetu
ch’ azis sas zitades bombaldadas
no b’ at cabu nemmancu rispetu
cando dinari mentes at comporadas
e faghen de sa terra disacatu
chena cundenna su peus reatu

emma Cubeddu
*
non lu tenzo a riposu su sentiu
ma este in evoluzione pro no fallire
e sos castello lu tenzo in obliu
e su chi tenzo l'ischio gestire
non mi fatto palazzusu in s'erriu
e su chi tenzi mil'isco godire
e cun su tempus malu chi bad'esse
errichesa e bellesa si perdede in presse .

Salvatore Sini

Lussoriu, s'intellettu pone in mesu
e-i sa bellesa puru in unione
però de cantu totu s'est ispesu
no azis mai fattu s'addizione
sa bombas pro me no an mannu pesu
ca fit istada un'umiliascione
de no misciare cun sa mia ricchesa
chi pro meritu meu est un'impresa.

Lussorio Cambiganu

Bellesa no at tempus ne misura
Ca est in s’arte e in sa poesia
Suberat totu e seculos b’ addurat
Comente sa bellesa de Maria
De l’ imbrutare bos at a benner dura
Ca est in donzi zassu e in donzi bia
No b’at ne intelletu ne richesa
Chi potat simizare a sa bellesa
Emma Cubeddu
*
e custu este sa dimostrazione
ca su dinare faghede dannu meda
faghinde dannu in dogni nazione
cun bombasa spaccjandu sa muneda
su chelveddu l'usàna a razione
sa nobiltade cun su coro e preda
si perdede senza ischire su comente
bellu e erricu poberu de mente

Salvatore Sini

Sa bellesa est bella ma istantia
cando sos annos torrat totu a postu
sa proa manna est istada sa mia
ca sa parte costosa b'apo postu
fatt'apo postes istrada e ferrovia
chi 'e tantos millione an su costu
deo l'apo propostu e l'apo fattu
ca so abbistu e bellu in su cuntrattu.-

Lussorio Cambiganu

de sa bellesa amus firmamentu
In feminas e art’ italiana
Pess’ a sa Lollo, sa Loren c’ ana tentu
Prestigiu pro sa Patria alu dana
De Dante e Raffaello b’est s’ammentu
De los istudiare b’ est sa gana
Eppoi de s’italica bellesa
Totu l’imbidian ca dat sa menzus resa

Emma Cubeddu
*
sa bellesa apprezzamus'a primu impattu
e i s'erricu ca ha donzi podere
ma cun su troppu si diventa maccu
e sa bellesa compra su maere
e grandu cosa mi no hana fattu
senza s'inteligente a mistiere
s'erricu e bellu este a dismisura
sìinteligente si faghe cultura .

Salvatore Sini

Ma...ite 'alet custa cantilena
nademi chentza e me ite faghides
puru sos mentovados est sun sa vena
Totu su chi toccades e bidides
in terra no bi ponet pè appena
nemmancu in mare passade podides
Cantu faghides in su mundu intreu
tot'appartenit a su bene meu.

Lussorio Cambiganu

Como a finire nd’ ogo sa carta ‘ona
Cussa chi Dante at postu in paradisu
Sa bellesa eterna chi perdona
S’avaru, su presumu e su risu
Issa su gosu a s’amina nos dona
Totu est pro nois cussideru e bisu
Est s’intelletu Mannu est sa richesa
De onzi cosa est funte de bellesa

Emma Cubeddu
*
tue has fattu stradasa e ferrovia
ca de dinare nd'asa in cantidade
ma sa progetazione via sa mia
e l'has donada pro ti la amistrare
ca de progettu non di cumprendia
de cale parte pro la cuminzare
cun su chelveddu apo istudiadu
faghinde bane l'hapo dimostradu .

Salvatore Sini

Isco chi cun 'ostra abilidade
medas cosas podides abbellire
ma sempre chi sa mia podestade
bos potat su permissu favorire
dinari etrettzos e localidade
a totu canos bos podet servire.
podides abbellire inferru intreu
cun cosas mias e in logu meu.

Emma Cubeddu
*
ponei sa bellesa pro crobetura
e su dinare a fagher fundamentu
senza s'inteligenza este sventura
tottu si leada unu corpu de bentu
portas s'inteligente cun paura
ca ti faghede is cosa bene attentu
qualunque cosa bi cherides fare
senza s'inteligente non podides'istare

Salvatore Sini

A custu puntu finit sa cuntesa
su donu est biadu a chie l'ada
sa bellesa est sempre una bellesa
chiest dai totu amada e disizada
chie non ad'amore a sa ricchesa
sempre in totu su mundu invidiada????
S'intelligenzia est donu distintu
chi s'omine a sos astros ch'at ispintu.-

emma Cubeddu
*
e bonanotte bos naro deo puru
soe stada cun bois cun piaghere
spero chi poi ndi faghimus attere
bonanotte cun sonnoso a su seguru
e una ischida siada de bonu gosu
e bonanotte cun bonu riposu .

Giuseppe Pintore *

Deo no isco mancu in cale data
cust'oportunidade azis tentu.
Peroe bos naro chi so cuntentu
chi una gara goi l'azis fata.
Duncas retzide su meu cumplimentu
lezida mi l'apo es tantu grata.
Pro cussu auguro de como in susu
ateras chentu gras e piusu.

Salvatore Sini ^*^*^

Cando torro in podere e sanos brios
si mi cherides m'azis a agattare
pronto cus sos versittos caros mios
a sighire la 'oza ' e poetare
sos chi nd'an' boza chi si fattan bios
pro che passare carch'iscuta umpare.
Sa poesia a bolu est unu donu
peccadu a la lassare in abbandonu

Giuseppe Pintore *

Cando su versu si mantenet ischidu
mai che ruet in s'ismentigadolzu.
Ma chi si lassat a un'ala su colzu
si faghet duru e no es preferidu
Sa poesia est abba de s'abadolzu
si bi jompet donni olta chi ses sididu
Aboltas a conca bascia ti che tufas
pius es cristallina pius nde bufas.

Paola Black ---

Zeltu chi sa poesia a bolu
segat brillias e truncat cadena
liberat ment' e coro da' sa pena
nos dat cunfortu e nos dat cussolu
no b'intrat s'est poete noitolu
o chi espertu est de rica vena
nen chi si la cantat e sonat solu
obur' in d'una piata piena...

...peroe sa cumpanzía, su grupu
ube mi onoro de fagher parte
ajudan totus, s'anzon' e su lupu

pro cussu poto narrer in disparte
mancu an postu su caul' a upu,
'su ch' ap' eo, poete sena arte...

Lussorio Cambiganu ^^^^^^^^

Cando sulan bentos e trascias
Nudda podet issas istejiare
Sas penas curren pro lu dispetare
meda bi restat de dolu.. a bias
Sa forza solu de sas poesias
In bolu lu poden suberare
Lebiesa issa ischit donare
Finas pro sas peleas pius rias

Giuseppe Pintore *

Su versu chi naschet in su profundu
de s'animu est issu ispressione.
A bias narat glorias de sa pessone
o narada sas penas de su mundu.
Est sempere a bolu vagabundu
ponet d'acoldu lupu cun anzone
Unu paret onu pro sa tragedia
s'ateru est adatu in sa cumedia.

Salvatore Sini ^*^*^*

Sa poesia a bolu o taulinu
est fruttu de elevados pessamentos
contivizada 'ene e de continu
donat suddisfascione e arrichimentos
e ondra de sustanscia dat a sinu
in sos malos e in bonos mamentos.
Sa poesia cabulat sa mente
si toccat sos sentidos de sa zente.

Giuseppe Pintore *

Lea una tzittade immaginaria
ue triunfa su bene mai su male.
Pro sa comunidade netzessaria
una leze chi contat universale.
Poesia e musica artes ispirituale
chi a sa distrussione es contraria.
Chi bat gherras e discordia pro difettu
no at custa richesa in s'intelletu.

Lussorio Cambiganu ^^^^^^^^

Nudda in sa memoria s'est persu
Grascias a sa bellesa in poesia
Totu est remonidu in unu versu
S’ istoria.. su sentidu e geografia
Sas dudas cuadas de s’ universu
Inie agatan risposta ebbia
E finas sas dimandas de sa fide
Bi creschen comente sa ua in bide

Giuseppe Pintore *

Sa zente est in chilca de sa lughe
po ettare passu in s'iscurigore.
Pero cussa lughe isteriore,
no semper a sa meta che lu jughe.
Lea s'esempiu de una nughe
in'intro es de su frutu su sabore.
Cando l'assaboras l'ispiegas
peroe mancu l'ischis chi no la segas.

Lussorio Cambiganu ^^^^^^^

Est beru.. dura est sa colzola
De frutu cando est saboridu
Comente pius forte est su sentidu
Cantu pius in altu che bolat
E puru.. sa poesia colat
Inue non arrivit su ‘ischidu
E bidet cussu chi non est bidu
Cumpanza est de pessona sola

Paola Black ---

Mira cantu s'intelletu esplorat
chi est a lu contare meraviza
sa rima che sa mama cun sa fiza
d' 'essíre da' sas íntragnas t'implorat
e posca cando ti la bies fora
s'arcanu lu disvelas ca t'abiza(s)
ch'ispantas, pro bellura l'assimiza(s)
a sa zeleste fiorida Flora...

...pro cantu bell' esserat in su sinu
a la muntenner cara remonida
alimentad' a sanu determínu

sa die ch'issa lompet a sa vida
d'amore prus e pius de contínu
l' 'íes mudàda tota e bestída...

Giuseppe Pintore *

Su tinnu sanu no est istragasciu
cumportat totu canta s'armonia.
Mira cando est unu tinnu basciu
no tenet bellura e ne fantasia.
Ma chi es coloridu de poesia
cudda segretta in su calasciu,
cando essit a campu acostumada
su circundariu de lughe allumada.

Lussorio Cambiganu ^^^^

Totu si podet chin sa poesia:
pigare Alpes e su kapadue
nadare in mesu de una nue
a bolu fagher mare in traessia
nde pesat s’ omine cand’ isse ruet
e pustis lu cossolat a ninnia
su mundu pinghet de galania
chi solu in fantasia gighet cue.

Giuseppe Pintore *

In s'Alpe Nanga-Parbat o Himalaia
chi sa oghe si pesat in s'altura,
cun s'eco essit fora de mesura
e de oghes nd'intendes una paia.
Bessit a campu su entu la fura
la trasportat cun isse trista o gaia.
Galu menzus su versu vagabundu
chi olat de sas alturas de su mundu.

Lussorio Cambiganu ^^^^^^^^

Sas boghes sunu meda pius de chentu
Sos ecos chi si seberan sa bia
Sighin su cambiare de su bentu
E totu los batijat poesia
Siat in su tristu o su cuntentu
In musica los ponet sinfonia
Su versu siat malu o siat bonu
Est semper de natura unu donu

Paola Black ---

Ides su disizu l'est primàriu
chi da' s'internu naschet, si l'aoras
arguai ca t'aflizis, t'addoloras
ca no bessit est unu calvariu,
si l' 'ogas de su campionariu
inveze for' 'e nitzu ti l'adoras...
... pro sa perca zeltu menzus s'altura
risaltat de sa oghe sa bellura...

Giuseppe Pintore *

Lea s'esempiu de su puzone
cantat sa melodia in donni perra.
siat in pianura o in sa serra
improvisat arcana una cantone
ma no cantat chi in terra lu pone
no cantat chi lu pones in terra.
Gai a sa poesia si dat risaltu
che su puzone si cantat in altu.

Paola Black ---
Bellu su puzone, isparghet ala
in s'aera 'olat, cantat lièru
ma chie alas no portat aberu
de apostizu las jughet a pala
e che Icàru pigat e si fala(t)
ma no rinunziat po disispèru...
...e tentat dae s'altu custu mundu
de mirare nessi unu segundu...

Giuseppe Pintore *

Icaru in chilca de s'orizonte
boladu est altu cun alas de chera.
Proite isse lu fit in s'ispera
a s'impresa sua de faghe fronte
ma faghet errore che Fetonte
cando acurtziat sa lughente isfera,
Unu si brujat s'ateru nde ruede
de tzeltas lezes niune pode fuede.

Lussorio Cambiganu ^^^^^^^^
Sa poesia chin su tempus mudat
Ma torrat da inue at cominzadu
Comente roda ‘e Piras s’ inghiriudat
Torrende a cant’ est bistadu nadu
S’ arcadia ‘e Padre Luca ‘alu addurat
Finas si Montanaru at cuntrastadu
It’ est sa poesia in veridade
Si non su sensu de sa libertade?

Paola Black ---
Sa leze de natura as resone
de l'osservare lu amos s'obrígu
pero' ischis de su tempu antigu
de la jambare tentat sa pessone
che a chie s'agattat in presone
ma tupadu est a tapp' 'e ortígu...
...pro cantu fortes sos muros de cudda
su tapu no lu frímada po nudda...

Salvatore Sini ^*^*^
Est tzertu chi leadu azis sa fua
pro su pagu chi mi so assentadu
su poddighe apo postu intro sa bua
e bois già l'azis assegundadu,
bella custa cosa fatta a cua
chi che a sempre già m'at ispantadu.
Custa est sa fortza de sa poesia
chi cun costantzia l'amus sempre in bia.

Lussorio Cambiganu ^^^^^^^^
Milla!! .. chi benit sa menzus risposta
A cantu apo pagu prima nadu
Paret chi siat fat’ aposta
Pro aer postu impare s’ ighinadu
Amigos torra bido in sa posta
Chi chilcan in sa cazza su siddadu
Sas feras de su dolu e sas peleas
Siendas de sa vida e sas isperas

Giuseppe Pintore *
S'artista su mosaicu costruede
e su versu su poeta tessede.
Su mastru de sa cultura suede
sena cussa no pode resessede.
Su pintore sa tela non pode fuede
pintat totu comente devet'essede.
Acco inoghe bellu su quadru
totu oldinadu nudda a soquadru.

Salvatore Sini ^*^*^*
Sa vida nostra est totacanta rima
su mundu nostru est tota poesia
ca pro sa rima totu amus istima
et 'eo pius de sa pessona mia
chen'issa est impossibile ch'isprima
sos sentimentos e sa fantasia.
Cun issa isprimo gioias e amores
o puru dende isfogu a sos dolores.

Giuseppe Pintore 

Cantu tenes rejone tue Barore
pro mene puru es che s'alimentu.
Est issa chi curat donni dolore
est issa chi sanat donni turmentu.
est issa chi faedda de s'amore
est issa chi nos'apagat s'intentu.
Est issa motu e vida e istrussione
est'issa sa linfa pro donni pessone.

Lussorio Cambiganu 

 Intrade totu bois in su cantu
Poetes de sa pesada noa
Lassadebos ninnare in sa coa
De chie bos carignat donzi tantu
Cussa chi bos asciutat piantu
Cand’ ojos biaitos sun in doa
O puru sun giamados a proa
De pintare su mundu chin ispantu

Salvatore Sini ^*^*^*
Poetes...chi poetes sa natura
at cherfidu offerzendebos s'istintu
che misteriosa e rara criadura
sempre galanu, sabiu e distintu,
pius de te de s'ateru as premura
de su chi pensas ses sempre cunvintu.
Nde so cunvintu e naro in beridade
chi su poeta est mastru 'e veridade.

Paola Black ---
It' ap' annangher a su ch'azis nadu
sena cumparrer s'ultim' arrivada
tot'est poesia in su criadu
e tota nd' est sa vida ammuntada,
da' su minor' a su mannu fiadu
fenas su fil' 'e s'elva lentorada...
...In totu su chi nos dada recreu
b'est sa poetica manu de Deu...

Giuseppe Pintore *

Osselva s'aurora in s'orizonte
cando su chelu totu lu dipinghede.
Issa sa lughe totue ch'ispinghede
in mare donni adde donni monte.
Gai sa poesia si distinghede
in donni tretu issa faghe ponte.
Cando in motu si ponet sa vena
totu tenet ligadu a cadena.

Paola Black ---
Est cussa sa cadena prus suave
si podet narrer est caden' 'e pruma
cando ides sos poetes a truma
che sordados ca difenden su Piave
tando su cunflitu no es grave
e nen timen de sas undas s'ispruma...
...Ca paret s'Ipocrene chi a lenu
iscùrrada pro lis dare sulenu...

Giuseppe Pintore *
Cun su versu totu is coros tzocas
proite es custu unu bellu impreu.
Su versu tou cun su versu meu
es fatu pro pitzocos e pitzocas.
Naran cando su cantore Orfeu
cantiat si moviana piantas e rocas.
E pro chi esse no esserat poeta
su cantu sou jompiat donni meta.

Paola Black ---
Custu ca donz'arte est poesia
pess' e creo calesiat sa chedda
s'iscultore narat: "Pedra, faedda!"
difattis mancu muda pare sia(t),
e la modellat a modu chi bía
cumparzat, o bianca o niedda...
... No importat colore ne punzone
da chi at perfetta s'espressione...

Giuseppe Pintore *
Mira sa ninna nanna amorosa
chi sa mama cantat pro su fizu.
A cussa criadura pretziosa
li cantada cantu ada in disizu.
Improvisat pro su candidu lizu
una poesia sa pius donosa.
Chi a su pisedu es de cossolu
cando chi si dromit in su balzolu.

Paola Black ---
Sa mama cantat, li dada sa tita
pro chi cumpletu l'est su nutrimentu
sa oghe melodiosa impíta(t)
pro chi suat lietu e cuntentu
issu papat e bistat atentu
creschet sanu, cando posca l'istíta(n)...
...issu puru iscapat a cantare
prim'ancora d'ischire faeddare...

Giuseppe Pintore *
Deo latte e poesia no apo sutu
s'abba apo bufadu in s'Ippocrene.
E como mi lu canto calchi mutu
custu ca mi faghet istare bene
chie cantat pianghende a socutu
e cue sa lagrimas no trattene,
chie improvisat pro sa noia
e chie cantat solu pro sa gioia.

Paola Black ---
S'abba la richiedit su fisícu
ma a bortas luntanu ch'est su putu
a bias l'as accantu ma est sicu
e ti turmentat su sidis acutu
o chi puru de abba siat ricu
a sa balza mai nemos l' at giutu...
... Dappoi pro iscollu s'est mandrone
tando ne buffat ne cantat cantone...

data-reactid=".hp.1:3:1:$comment840074506062895_841211085949237:0.0.$right.0.$left.0.0.1.$comment-body.0.3.0.$end:0:$11:0" class="img UFIActorImage _54ru" data-reactid=".hp.1:3:1:$comment840074506062895_841280665942279:0.0.$left.0.0" v:shapes="_x0000_i1025">

Giuseppe Pintore *
S'abba es primariu elementu
proite in issa es motu e vida.
osselva sa flora s'illibada sida
in s'adde silvana est portentu.
Cuddos chi s'abba no an tentu
totu sica a un'ala las bida.
De chilcare unu mai s'orroschede
chi s'abba jara chere connoschede.

Paola Black ---
De chircare s'abba no as bisonzu
c'as talentu da' manos no ti fuet
e c'as s'ingegnu ischis chi ti ruet
dae chelu s'abba pro s'inconzu
ne times chi ti sicat su aronzu
ne chi tropu garriga est sa nue...
... Ma una cosa timer teves solu
si lassas sas musas in oriolu...

Giuseppe Pintore *
Deo naro a la serrare cun custa
ca donni cosa enit a finitia.
Sa musa nos at fatu cumpagnia
unu pagu cun versos l'amus infusta.
Siat cosa isbagliada o zusta
isperamos nessi chi siat gradia.
Pro como nos ponimos in retiru
e nos bidimos a s'ateru giru.

Salvatore Sini ^*^*^*
Cust'est amore mannu puru e nettu
su ch'an' in coro Peppe e Pauledda
cun Cambiganu e ateros de trettu
chi umpin' de cust'arte una chedda,
e tando ca a sa cosa azis affettu
sighidebbila settidos in sedda
e curride cun sas rimas de sa vida
e sempre alluta siat sa fiammarida.

Francesco Canova **
Sezis tottu d'e bunu talentu
mancunu,gia est restad 'a coa
ogniunu bogende roba noa
e arrivende a su sou intentu
retzit dae a mie su cumplimentu
pro sa bella gara e sa proa
e custu bolu chelz'augurare
e atteras che i custas nde cantare.....

Francesco Canova **
Dadu c'atzisi devidu terminare
e non est bellu a m'istare mudu
isperende atteras in su futuru
chi atteras garas potedas presentare
ca so prontu a la leggere puru
e unu giugiziu poto dare
pro chi non sia un'aggiuria
ma poto narrere puru sa mia....