e como… In finitia de 5 ‘e maju??

e como…  In finitia  de 5 ‘e maju??

Como comintzat sa bera sicagna
Cussa ch’ atit famin’ e carestia
Posca d’ annos in fura sa cucagna
Finida oe lis est sa mandronia
Lechinos, cortigianos lagna-lagna
Chilcan padronu pro sa terachia
A manca e a dereta  tot’ orfanos
Timen d’ esser torrados a umanos

Chie tirat dereta chie a manca
Totu los amus bidos bene aldidos
De mantessi colore cussa franca
Chi betan a su mele sos paltidos
Alu inie a  s’ arranc’ arranca
No biden chi sos tempos sun finidos
B’at solu de coglire sos cosintzos
Su zapu, una bertul’ e sos pintzos.

Vint’ annos de inghirios in sa giostra
Chilchende de pigare pius in altu
Impare coglionende sa nostra
Pro fagher issos su menzus saltu
Totu si l’ an buffada sa colostra
Lassende-nos che su sole de maltu
Chi paret caldu a sa die giara
Pustis in fatu t’ ilfundet sa cara.

Illusos dae su menzus benidore
Ligados dae trobea de s’ ignorantzia
Si pesat su manzanu pedidore
Su sero già occupat un’ istantzia
No cheren iscientziadu ne dutore
Ma solu sa teraca cumpantzia
Como chi cussa colla s’ est sicada
Si falan che linna pupuinada.

Dae oe a cras.. an a pessare a deris
De cantu b’ at restadu ‘e su telalzu
De mesu chi pienat su carreteri
s’ alga chi gighent a su muntonalzu
a palas s’ umbra ’e su carabineri
lu sighit.. e coro li faghet balzu
si boltat a sa manca  e sa dereta
a faca gighet semper cussa preta.

S’ est beru chi drommit Napoleone
In logos de esili’ e disterru
Sos fantes, sos ateros che titone
Si morin a su fritu de s’ ijerru
Non bido atera soluzione
Ch’ abberzan sas giannas de s’ ilferru
Pro chie tot’ impare in su Paese
Sa trava nos an postu a conca  e pese.