Poetas e artistas
Poetas e artistas totu impare
unidos in piata “Fantasia”,
pro poder una die abbaidare
su mediu de torrare in armonia.
Si damus a s’ ispiru ite contare
faghimus una bella sinfonia,
chi totu an a coro in su sentidu
s’ ispantu de sa vida e su naschidu.
M’ ammento meravizas donzi die
cando currende fatu istaio,
a giogos de imbentu 'e bocia ’e nie
su coro a tocheddos lu tenio.
Totu parian benzende a mie
sos gosos e pauras non timio,
de pumas e de alas fio estidu
brinchende sas cresuras mi so bidu.
Gai comente tando, como so
cando m’ enit a mente criadura,
prezisu in rimas ponzo e bos lu do
su ch’ amus bidu a prima naschidura.
Su chi fit tando, proite como no
d’ aer su bene ’e totus gasi in cura,
bucones de pane cumpaltidu
pro totu fagher narrer “so esistidu”.
Cale dificultade nos ingannat
cando su tempus bolat che su bentu?
Pro pagu, lassamus foltuna manna
sos dicios, sos amigos e s’ ammentu.
Sas frinas nos tremen comente canna
e de pauras faghimus apentu,
paret a nudda chi siat selvidu
su ch’ amus fatu e su ch’ amus bidu.
Poetas e artistas bois l’ ischides
cal’ est in coro bostru su cossolu,
aculzu e in su punzu la gighides
s’ idea de sa bellesa e non solu.
Pintores in colores lu ponides
cussu cuadru chi azis tentu a bolu,
bois poetas , mannos e minores
In su desertu, pradu de fiores.
Nessun commento:
Posta un commento