Sardigna, unu mundu minore.

Sardigna, unu mundu minore.


Totue b’at de narrer cosa bella
de custa terra antiga e ilmentigada..
Sas costas de Caddura che s’ istella
brillant dae Cabu testa a sa Pasada
a intro ‘e sa campagna est pius bella:
suelzos, rocas li dant sa pintada..
dae su mare a monte Limbara
poetas de limba galana e rara.

Dae suta, chin sa natura issoro
sas biddas e sas tancas d’ Otieri:
Totu impare est terra ‘e Logudoro:
poetas, pastores e inzateris.
Sos logos chi pius tenz’ in coro
chi m’ alimentan alen’ e penseri:
su casu, sas peritas de Patada
elighes, abba de sa Fraigada.

A s’ ater’ ala de cabu ‘e susu
bi pasat s‘ Alighera e Poltu Turre..
A Tathari impoltu dant piusu
s’ istoria chi impare bi curret.
Politica e cultura est in bon’ usu:
Sas modas de su logu la succurret.
Limba divescia est sa catalana
misciada chin sa Nurra turritana.

Sos montes d’ Uliana e Luvula
ponent a Nugoro sa corona..
Pilos canos ue su bentu sulat
de sa Sardigna antiga matrona.
Tenores ‘essin dae su coro e bula:
Barbagia areste: su chi Deus nos donat.
Su tempus, si resessit a frimmare
in usos bonos, sempre de ammentare.

Su regnu d’ Eleonora a mesania
decantat e nde pianghet su lutu:
Sos codices, s’ orgogliu in agonia
Tharros e Fordongianus est derutu.
Vernaccia, binos bonos, malvasia
si bidet sa luna intr’ e su putu:
Sos ruderes de Santa Cristina
richesa vera.. est manna s’ istrina.

Falende sa basciura ‘e Campidanu
s’ abberint terras fertiles donosas:
Giaman ajudu, unu colpu ‘e manu
zappos, tratores cuados in losas.
Pro pumatas, binzas e zafaranu
a postu ‘e sas zizias fiagosas.
Donzi tantu ispicat su nuraghe
tot’ uguale est in tempos de paghe.

Bidende sos montes a sa dereta
de Linas e sas rocas d’ Arcuentu..
logos de cazza russa e bona peta
minieras  et  lotas chin su  bentu.
Sa zente, isetat sa sorte chieta
de su destinu nde faghet apentu:
su ramine, s’ istaniu ch’ ant bogadu
de brunzu cussu populu est restadu.

Atera terra b’ at in s’ oriente:
S’ Ozastra, sa Quirra e su Gerrei
Sarrabus.. meda pedra paga zente..
che luna paret e gai l’ idei.
Totue multa e ticu de abbaldente
“saludu e grascias amigos” lis nei.
Totu mi paret fatu a iscalpeddu
custu cuzolu ’e mundu minoreddu.

Milla a issa !!.. sa bidda ‘e Casteddu
abbelta a su mundu e su mare..
cale antigu zeniu 'e chelveddu
t’at bidu inoghe podere pasare.
Colores: canos, grogos e nieddu
totu ch’ an fatu nidu in s’ abbitare.
In finis de custu giru in tundu
m’ abbizzo cantu est minore su mundu.