Bitti.. Orune et Orgosolo

Bitti, Orune, Orgosolo

Bitti, Orune, Orgosolo su cantu
bos ligat in sa bella melodia
sa poesia bos at dadu tantu
gai l' azis torradu cortesia
de sa Barbagia sas prellas e bantu
in Sardigna sa menzus balentia
isfida chena paris in sa gara
binchìda cando mustrades sa cara

Falende in sas curvas dae sedda
aparis che a teatru romanu,
'e longu sistemada manu - manu,...
urgogliu de sa tzente chi faeddat.
t’ intortigas in bias chena pianu,
ti miras che una bella pisedda
iscoizende in mesu ‘e piazedda,
in mustra de su bellu corpus sanu.
Ti ponen fatu diciosas sas boghes,
pro gloria ‘e Maria Meraculosa
in festa zente b 'enit numerosa
dae logos pro s’ispera in bonu proe.
De fitzos tuos mustras orgogliosa
in paghe o tucados a gherrare
chin sa brigata sarda tot’impare:
famada pro sa zente valorosa.
Vitzi est numen chi jughes in sinu,
tenores bonos cantan vitzichesu
donendedi s’unore chi t’est resu,
sighis semidas de bonu destinu..
Meravitza 'e situ Romanzesu
de virtudes lontanas e vicinu,
damus gloria a Pira Mialinu
in "Sinnos" de sa vida c' at cumpresu.

Comente una crabola curridora,
chi brincat e si movet a sa sola
sa fantasia chi ti movet sa mola,...
d' isetos chi ti manden in bon’ora.
Bella, pasada in sedda soliana,
bides baddes e sole d’ oriente,
sa vista chi semper mustras balente
t’ aparis che a mariane in tana.
Sas artes chi tenes semper presentes,
sa pizinnia paret chi pius galana,
issos isperas bonas tie dana
in armonia ‘e coro pro sa zente.
Orune tene forte ambos pes,
no dias palas a sa bona sorte,
fortuna tue la giughes in corte
bastat d' isperiare su chi ses.
As dadu pro sa patria vida e morte
ses bidda de Barbagia, ses su faru
dende sa vida a Antoniu Pigliaru
sias fiera .. digna, bella e forte.

Orgosolo cantu t’ apo mirada
In tempos chi parias sa foltesa
Su mundu totu ti fit in falada
Bisura che dae runda in s' altesa
Famada pro no esser mai domada
sos invasores mai serva t’an resa
Si gai no est .. tantu apo pessadu
Comente in su connotu m’ est restadu
Bona die Orgosolo a tie
a sos chi ti dan bantu in poesia
a Zuanne Pira e siat a chie
ti rendet su saludu donzi bia
su piaghere chi tue das a mie
in su cantu a tenore e s’ armonia
‘onzi mamentu tue naras presente
cando bisonzu pedit sa zente

Orune.. Bitti chin zente Orgolesa
sun de su circundariu de Nugoro.
issos nd' an gitu de pilu in su coro
gherrande in sa brigata tatharesa