Luna piena
Luna ti canto una bella cantone
pro ti donare unu mamentu ’e pasu,
ti torro unu pagu ‘e ‘moscione
cussa chi dae sempre das pro casu.
Cando leas a coro sa pessone
paret chi bolet a caddu 'e Pegasu,
no b’at bisonzu de sedd' o seddone
ca est solu un’ istante.. una ijone.
A bias pares bella sorridente
in note jara de luna piena,
cando fin’ erva s’ idet creschende
e faghet sa muida lena-lena.
su grodde chi s’ intendet urulende,
su cucu chi lu faghet pro apena
sos sonos de sa robba in pasculia
tot’ est un’’ orchestra in sinfonia
isteddos chi ti faghen de corona
paren chi sian pius luminosos,
e tue sempre diciosa matrona
lis das cuntentu e sos menzus gosos.
Cantu ses luminosa tue ses bona
e curas de sa terra sos reposos,
siat in note jara o not’ iscura
nos porris un’ ispera de segura.
Nessun commento:
Posta un commento