Sos poetas mannos de Patada

Sos poetas mannos de Patada

Cando musas faladas d’ Elicona
an chelfidu chilcare sa pasada,
in abbas de Casina e de Corona
an ilgiucadu custa faeddada.
Alu inie sos versos bi sonan
ispalghende s’aera de Patada,
sa menzus a orijas melodia
cussa chi totu namus “poesia”

Su primu ch’ at coglidu  fiore
est Pesuciu, de ‘Antina Babbai,
tando su babbu e su promotore
de modas chi non s' ilmentigan mai.
S’anzone,s’abe e finas s’astore
at decantadu e femin’ arguai,
dae tando a como sighin cussa bia
totu poetas de sa limba mia

Su menzus fizu de isse pesadu
est cussu chi nois giamamus “Mannu”,
de Padre Luca, totue b’at siddadu
ch’ at rimadu sinzeru chena ingannu.
Sas musas isse ana batijadu
dendeli s’arte ma finas s’afannu,
a Flora,  Venus e sa bella rosa
at incantadu ma... mai s' isposat.

In vida passada mudu –mudu
omin’ e cabu e pagu faeddu,
notu pro esser frusta tutti “Limbudu”
a s’ intacu calpit su chelveddu.
Su toltu, disonestu e s’azzudu
traperi de presumu minoreddu,
at fatu de su falzu unu degogliu
iscriende in segus de “s’ Imbrogliu”

Campanas tristas chi alu cantana
de cuss’ amore chi no gosat mai,
su zeniu mannu Antoni Sini Ogana
passat sa vida in penas e guai.
Bainzu Moro de poesia gana
un’ e sos mannos est propiu diai,
poemas e sonetos fabulosos
chi allegran siat orijas che ojos.

Sighin in fatu, Cocera chin Ciddoi
vint’ annos innozente presoneri,
sa fama ch’ aiat innanti  e poi
d’ esser a bolu  menzus poeteri.
De ateros sa fama si costoit
in mentes siat de idda o furisteri,
Caltapedde, ‘Edola e Capiale
cantan sa poesia chin cabale.

Sighin Ejana, Pichizol’ e Alghitu
Corveddu, Limbori ,e Alcadu,
Corrias Paul’ Antoni e Gallitu
Giagu Monzita a Mazza acumpanzadu.
Sos mannos de como sun apitu
a lis dare a issos mentovadu:
Nanni Cambone impare chin Palita
no che sun pius.. ch’ est Zuseppe Monzita