Si tio poder..
Si tio poder esser de sulenu
aio fatu meda poesias,
de cussas chi mi 'essin a bias
chena chilcadas, a filu 'e alenu.
Sas pius lezeras rimas de sas mias
chi tantu renden su coro serenu,
sa dulche melodia chi penseri
bolat in fantasia e ‘ue che ferit.
A su dolore li tio narrer “marranu!!!”
“proite tue nde faghes presentzia?”
“Forzis ti pessas de sa vid’ essentzia:
chena s’ ijerru no benit su beranu?”
B’at esser puru un’ intelligentzia
chi siat pius de tene soberanu,
bene !! in sa vida sunt sos disizados
finas si males no sunt mai mancados.
A sa bellesa la tio incorniciare
tota impare,, intr’ e coro meu,
a modu ‘e poder dare su recreu
a chie cheret su mundu amare.
Pustis nde tio fagher bon’ impreu
dendel’ a chie la pedit pro 'istare,
pro poder isse un’ atimu in sa vida
coglire de sos gosos pibinida.
Si tio poder esser de ajudu
aio fatu unu cumponimentu,
chi tiat esser pro totu de ammentu
cando a sa vida si dada su saludu.
Est propiu tando, prezisu mamentu
nos ammentamus d’essere fatos de ludu,
totu presumos, vanesios, e richesas
perden sa forza e torrat sa bellesa.
Nessun commento:
Posta un commento