bon' Anghelu e risposta de Barore 'e Sini

Bon' Anghelu e risposta de Barore 'e Sini

Proite nois  a bias Deus chilcamus

Cando a fac’ a nois est presente

Forzis de Isse nos ilmentigamus

Cando totu est bellu e risplendente

In coro lu tenimus si  l’ amamus

Bastat de lu render evidente

Dae sos ojos e dae su bisu

S’ idet d’ isse mirada e su sorrisu

Isse si mustrat in car’ e sa zente

Non tenet una fromma corporale

De padre Pio at pedidu sa mente

Nendeli ite fit bene et pustis male

Santu Franziscu l’ at giut’ a dischente

Ispozu l’at de su materiale

Ambos an fatu ‘e poberu s’ inchinu

Però a Deus an apidu ighinu

Fatende  pagu ‘e mente a su Segnore

Cando su mundu  pariat divinu

Si como torrat sa vist’ e minore

Finas su Ninnieddu  est vicinu

Presepiu chin lanedda et amore

 daian su sabore bucantinu

Como totu sos oros de sa terra

S’ impitan pro vanesiu o fagher gherra

Est beru chi como sa vid’ est dura

Gulpa de s’ uman’ avididade

Cando pessat de crescher fura –fura

E no fatende cont’ e abilidade

Sa cheja sol’ a Deus at in cura

Ma no est isse in sa realidade

Deus in terra est intro ’e sa zente

Parende  orijas  est elocuente

Naran  omine est dulch’ e ranchidu

A bias  tristu e pustis cuntentu

S’ est bonu, narant  tontu c’est naschidu

de abbistu nde  faghen su  monumentu 

ma forzis alu  nudda est peldidu

Si Deus gighet a su coro tentu

No est  s’esser de cheja fervente

ma d' ‘ider cussa lugh’ isplendente.

Non b’at de pelder  tempus in s’ isetu

De l’ider cando  s’ est recuende

Mancari in su balcone dirimpetu

Chi  paret, siat  isperiende

torr’ a narrer c’ abbitat in su petus

A faca de su musculu pompende

In sambene lu faghet navigare

de corpus chi l’ ischit  ospitare

pro cantu  si non si  fit  riveladu

Aite fit naschida sa terra?

Solu pro fagher paghe e pustis gherra

E lassare su mundu triuladu?

Gai tot’ in miseria fit restadu

su male  solu  inie totu  inserrat

Ma ischende de sa fide rivelada

Onz’ olta dae miseria s’ est pesada

 De onzi male nde faghimus rughe

E l’ ilfelchimus sempre fitianu

cando s’ iscuru che leat sa lughe

 damus gulpa poveru cristianu

disizos malos atesu nos jughen

de’ nos dare un’ istrinta ‘e manu

sempre  binchet sa forz’ e s’ egoismu

de  podère, avidu e narzisismu.

Populos sun de onzi continente

Sa cara, tratu ’ e s’ espressione

de unu Babbu solu de sa zente

chi pregat in divescia religione

sun modos de passadu e presente

chin dan una divescia opinione

ma totu isperian su chelu in pizu

chilchende d’ ider de Deus su fizu

De totu su chi legio o c’ ap’ iscritu

Nudda agiunghet a cuss’ evanzelu

Totu paret jaru, totu dritu

Pro arrivire a gianna ‘e chelu

No ti fatas dimandas ne cuntritu

A faca b’ est presente  bon’ anghelu

Cussu chi tantu nos paret assente

E puru  nos faghet de assistente.

PRO BON' ANGHELU " In risposta a Rino Cambiganu.

Lussoriu, custa 'olta de abberu
in coddos postu m'as custu barrellu
ca cussa tua sestada de altu imperu
l'as pintada cun tinta e cun pinzellu.

Det esser' chi sa mente mia est istracca
o puru abbandonadu dai sas musas
como sa rima mia paret macca
e no attibin pius ca paren trusas.

Su bon'anghelu tou,cun milli inghirios
bataza meda m'an' dadu a sighire
su cursu filosoficu 'e sos rios
meda b'iscurren' venas de ischire.

Rispondo a cussa tua cun cussu pagu
chi mi cuntzedit oe sa mente mia
ca pro che ponner su filu in cuss'agu
carchi troboju si parat in bia.

Est beridade manna chi sa tzente
cando avvertit su male ch'est serente
pius forte a Deus pedit s'ajutoriu
ca est s'ultimu e sagradu illusoriu.

Che bonos cristianos a Deus chircamus
ca nachi Isse est prontu a su bisonza
pro custu est chi nois l'invocamus
cando bidimus carchi cosa isconza.

Sempre presente l'amus in sa vida
atzetende de s'esistenscia, su misteru,
de s'Altissimu chi a totu dat cundida
isperansciosos chi totu sia beru.

Medas sun esempios de fide
ca de s'altu nd'ant retzidu donu,
nois, miseros mortales, cale fide,
si no cussa chi nd'intendimus sonu.

Totus semus in sas manos suas
e Isse 'e totus ghiat sas atziones
cunfromma a sos mamentos e rajones
sempre in balia de cottas e cruas.

Ite culpa a s'omine, a Isse fizu?
Proite a mizas morin' innotzentes,
proite tantos males inclementes
in custu mundu barriu de ghilizu?

Ite male apo fatu in custa terra
pro meressire tanta sufferenscia?
Nudda 'e pius pedia in reverenscia
de no finire in totu a culu in terra..
S.Sini