Cando t’ap’ idu… (dipinto di Shikanù)

Cando t’ap’ idu…

In sa mirada apo coglidu solu
s’scampiada de sa cara tua,
su coro m’at leadu su ‘olu
chilchende ‘e ponner fatu a sa cua.
B’at restadu ispin’ e arrasolu
de una presenzia chi at leadu fua,
totu si ch’ est imbeltu in lestresa
che neul’ e manzanu s’est ispresa.

In cuss’ istante de diligadesa
t’ap’ adornadu tota a inghiru,
una puzon’ e paghe b’apo presa
pro 'istare chin tegus in s’ ammiru.
Unu cane de Fonne in atesa
pro difender a tie dae s' airu,
sos elementos tuos pius bramados
ap’ afferadu e poi indeorados

Cantos mamentos de vida fadados
chi no si coglin in cussos istantes,
ca si pessat de l'aer furados
o puru d' esser bijon' abbagliante.
Pustis ti torrat chin lizos mudados
chena cumprender issos a bastante:
“As peldidu su carru ‘e sa foltuna
chi passat una ‘olta e solu una. “