.. a una dea..

. a una dea..


Adoro s'arte in sa fotografia
e tantu coglio e nde poto gosare
Inue ‘ido chelu ..terra e mare
Ijone solu de sa fantasia.
Cantu ses tue una poesia
Eo ti chelzo iscrier’ e cantare
In ojos tuos poder navigare
E bi lassare sa semida mia.
Totu mi paret una maraviglia
Sos pilos chi adornant una dea
Tue tra totu.. sa menzus idea
Bardada dae seda e de ischiglia
Sa menzus tue ses de sa famiglia
E de sa razza umana feminea
Chin tegus finas Venus paret fea
In giogos.. ses reina ‘e sa mariglia.
Sas laras gai caldas purpurinas
Parent duos rubinos ‘castonados
Tesoros mai iscobeltos.. cuados
Chi donas solu pro fagher istrinas
Sas cristas mi parent cosas divinas
Arcos fatos e bene disignados
Michelangelo ..los at pinzellados
Chin su talentu 'e artes subrafinas
Su nare bene fatu a iscalpeddu
Perfetu . manc’ una imperfescione
De nuscu ses tue cuss’ emoscione
Chi garrigat carena e su cherveddu
Totu inoghe b’est.. francu faeddu
Ca solu bisu est .. una ‘ijone
Ma mi cuntento de s’ atentzione
Chi dat sa dea … a unu poeteddu

Giovanni Pau 

Cambicanu andare des fieru
De sa chi b'est in sa fotografia
Ca til'ammito chi est bell'aberu

Però no lu est ne tua ne mia
Cussa dea simile a giunone
Chi t'inchende su cor'e allegria,

Est beru, est atraente visione
De cussasa chi pagas sind'a bidu
E chi la dias cherrer'in persone,

Però non creo ch'a tie Cupidu 
Cun d'una frizza trapasset su coro
Pro chi lu tenzas sempr'inteneridu.

Geo puru sa bellesa bi l'onoro
Ca cussa non lu est unu misteru
Ma solu cun sa vista m'innamoro,

B'est chie diat ceder'un'inperu
Pro una femina 'e gai bella
Pro nde esser de issa fieru

Ma tue dae mente la cancella
E miradi un'ater'orizonte
E chissà ch'ispuntend'in su monte
Non ti potas mirare ater'istella.