Sos sensos umanos (nuscu.. sabore e iscultu et ateros) Pintore..Pau .. Cambiganu .. Capra .. Canova .. Sini 28 sett 2015

Sos sensos umanos (nuscu.. sabore e iscultu et ateros) Pintore..Pau .. Cambiganu .. Capra .. Canova .. Sini 28 sett 2015

^^^^^
Ite sun poetas de valore
Ch’ ispinghen versos e su pensamentu
Pinghen muros nieddos de colores
E a tempus passadu dant s'ammentu?
E tando tue Giuanne chin Pintore
Impare a Gosimu e ateros chentu
Cantamus unu tema perunu
Eo leo su nuscu e su profumu.

Lussorio Cambiganu ^^^^^^^^^

A bias iss’ est lebiu ateras fruscu
E intrat dae nare a su chelveddu
Fiagos de natura dan su nuscu
De vida .. dae cando minoreddu
Profumos de su mare e de su buscu
Cussos chi gighet ‘alu s’ anzoneddu
Fin’ isse peldidu in mesu a s’ ama
A fiagu li leat trata sa mama.

Giovanni Pau

Lussoriu si cheret profumadu
Ca si crettet cuntinu in su eranu
E tottucantu da primu manzanu
Narat chi dae isse enit nuscadu
Però , da ue unu at troddiadu
Creo chi isse s'abbarret lontanu
E creo, manc'a currere ch'isettada
Prite cussu profumu non l'azzettada.

Giuseppe Pintore *

eo semper su nuscu a su nasu
es bonu comente unu si sogna,
de custu nde soe deo persuasu
no agradat su fiagu de sa fogna,
pius pagu chi bat una carogna
de un'animale chi at invasu,
cun su profumu sou s'ambiente
sa cale faghet fuire prontamente.

Lussorio Cambiganu ^^^^^^^^^

Si tratat de sa botza e sa idea
De cherrer bider lughe o puru buju
Chie la passat semper in pelea
Annegat finas chin s’ abba a benuju
Eo sa vida bido tota intrea
E non comente una cann’ e fenuju
Sos nuscos e fiagos tot’ impare
Mi dan s’ ispiru pro poder amare

Giovanni Pau *

Si tue ses d'amare in s'isperanzia
Sos profumos de rosas e violas
Faghe attenzione inue colas
Ca bind'at puru d'attera sustanzia
Ca non bi son solu cuddas molas
De fiores d'eranu in abbundazia
Ma bind'at puru de calchi carogna
Cun'ateros d'iscaricos de fogna.

Giuseppe Pintore *

Ma chi leas una rosa delicada
e la dasa in donu che fiore,
ruja est issa simbulu de amore
de chie la retzit subitu nuscada,
e narat tantu custa est agradada
chi mi jambat in s'animu s'umore.
Ca l'istat fiaghende a pagu pagu
sinnu est chi agradat su fiagu.

Lussorio Cambiganu ^^^^^^^^

Proite non t’ ischirrias su tema
Chi siat a tie in assimizzu
Chena chilcare sa solita ilmena
In mares chi non coglis s’ischizzu
Sa musa de Pallade atena
Ti sighit .. ma solu li das s’ aizu
In versos de polemica e ciascu
Pienende de aghedu su fiascu

Francesco Canova **

Dadu ch'invitu as fatu manu manu
non mi tiro a segusu mancu d'eo
e tema leo su chi so deo
e mi conto su pius'antzianu
pro chi folte non sia e ne sanu
ma si su talentu m'atzuat mi recreo
e bos fato tando cumpagnia
cun sa modesta mia poesia......

Giuseppe Pintore *

Ja l'ischis deo no nd'apo pedinu
a ti cantare su tema a primore.
Ma chi est a lu ponne genuinu
bi cheret pro e contra cun fervore
lu dasa e cantamus a puntinu
gai donnunu si faghet onore
chi donnunu seberat a contu sou
no s'ischit cale est meu e cal'est tou.

Lussorio Cambiganu ^^^^^

E tando.. ti l’ ischirrio eo
A tie Zuseppe Pintore
Su tema ti do de su sabore
Chi pesso ti piagat et creo.

Giuseppe Pintore *

Como chi sa limba mi apo infustu
in s'abba cristallina e s'ippocrene,
comintzo abberu a bi leare gustu
e comintzamus a marziare bene.
Siat de mandigu a buddu o arrustu
nde connosco su sabore chi tene.
l'assaboro cuntentu e mi recreo
ca su sabore connosco solu deo.

Lussorio Cambiganu ^^^^^

E tue Canova chi ses torra in pista
Beni chin nois a custa cantada
Faghe de custu sensu sa cantada
E bantadi tue bisura e vista

Lussorio Cambiganu ^^^^^^

Giuanne tue dae lughe a s’ iscultu
Ca isco chi non cheres iscultare
S’ orija pero deves impitare
Si cheres aer de gosu unu sultu

Lussorio Cambiganu ^^^^^^^^^

Barore Sini tue ses atentu
A sos dolos e sentidos fungutos
A sos disizos e sonnios rutos
Tando decanta s’ amor’ a s’ ammentu

Salvatore Sini ^*^*^*

A sa tristesa m'annanghes tristura
ponzende a chirriare sos ammentos
da-e cando fio ancora criadura,
cant'abba ch'est passada e iscalmentos
in tantos annos de durch'ermosura
cando fin' bios totos sos fermentos-
Como ti naro chi so mesu mortu
ca sun' passados tempos de accunortu.

Lussorio Cambiganu ^^^^^^^^

Tue de tene ses chilchende portu
Chi ti gitat a logu solianu
Inue su tempus ti porrat sa manu
Pro torrare a su bisu risortu
Cando alenu bat.. mai est mortu
Bisonzat de l’ usare fitianu
Comente faghes tue pianu-pianu
Ch' adritzas de versos su ferru tortu.

Salvatore Sini ^*^*^*

Ti dia ponner' fattu Cambiganu,
ca de cunsizos nde das' a iosa,
s'in custu mundu essende ancora sanu
in fundu aia lassadu fossu e losa
pensende a unu campare pius umanu
nuschende sos fiagos de 'onzi cosa.
Gratzias a tie umpare a sos amigos
chi mi dades custos durches abbigos.

Giovanni Pau

Sas noe sorres mi fia preghende
Ca no Ischia sa vi-e leare
Non potende ider ne assazare
E ne istare cuntinu nuschende
Poi ecconde una a mie nende
Juanne tue deves'iscultare,
E geo inoghe iscult'onzi sonu
Cun s'isperanzia chi bos bessit bonu.

Francesco Canova **
Apo a proare a bintrare in pista
pro chi sia betzu e puru lanzu
zeltu non mi conto mancu istranzu
pro chi non fetta bona concuista

Lussorio Cambiganu ^^^^^^^

Totu in vida sI leat a seru
Prima de lu tocare e l'aer bidu
Su nuscu est su sensu beru
Chi narat pro primu si est naschidu
Isse s'abbizat d’omine sinzeru
O puru si est malintragnidu
comente profumat sa bella rosa
gai pudesciat una falza cosa

Giovanni Pau

Paret chi de su inu su fiagu
Ti che epad'infustu donzi tudda
As'aer pensadu , buff'a pag'a pagu
Ca gai non mi ad'a fagher nudda
Ma puru sì as buffadu cun sa trudda
Paret chi Commo sias imbriagu,
Ca cussu c'as'iscrittu non comprendo,
Mi deves perdonare si t'offendo.

Lussorio Cambiganu ^^^^^^^^

A cue sempre che cheres torrare
Inue b'at fogu et isfida
In triulu gia b'ischis istare
Pro Te cussa est solu sa partida
e tando ti la torro a ispiegare
chi nuscu non dat mai sa faddida
Ischit su ch’ est malu e su ch’ est bonu
Prima de intendere su tronu

Giovanni Pau

Paret chi l'epas dadu un'azzustada
Ca comm'ido s'iscrittu differente,
Prima fi totu cunfusionada
Chi non b'apo cumpres'un'accidente,
Ma pro comente Commo l'as mustrada
Toccat chi torre insegus lestramente
Ca commo ene su versu l'intendo
E finzas calchi cosa bi cumprendo.

Giuseppe Pintore *

A comintzare unu tema e no sighire
es che sidis a s'abba e no buffare,
Cando chi si solet comintzare
s'obera est zustu a la finire.
Chi no si morit in su naschire
est difitzile poi a bi torrare.
Chi bi torramus a pascher'in campu
s'elicona no si serret a istrampu...

Giovanni Pau
Si si ponet infattu a Cambiganu
Non creo chi si triuled'arzola
Ca isettend'a isse a ponner manu
Su tempus tot'invanu si che cola,
Si non no la faghimmus a sa sola
Restammus in s'appitu a bider ranu,
Pro cuss'est menzus si non l'isettammus,
S'est ora 'e triulare triulammus.

Giuseppe Pintore

Mancu li dias culpa a cambigianu
pro chi tue l'iscas est tribagliende.
e tempus no nde tene su manzanu
custu Juanne devimos cumprende.
Bi est chie su versu podet rende
e chie andat pianu pianu.
Ma goi no si jompet a sos cungruos
chi semus battro a cantare in duos.

Lussorio Cambiganu ^^^^^^^^

Est beru chi brinco de pala in frasca
Comente su tempus chi est fatende
Un’ iscuta ‘e sol’ e pioende
Como in friscura e luego basca
E tando bogandelu dae sa tasca
Giuanne tue.. su chi ses pessende
Pone cominzu a su tema nou
Daenos tue .. de gara su prou.

Cosimo Capra *

Si su tema che ogades dae manu
E aberides un'atera fentana,
Gai si 'e cantare nd'azis gana
Istade da su sera a su manzanu,
Ledebos un'argumentu sanu
Cantade sempre cun bidea sana.
Gai onzunu de poesia dait prou
Da ch'at in manu s'argumentu sou.

Giovanni Pau

Lussoriu ca lu ses impignadu
In ateros trivaglios die die,
Ite trivagliu poto dare a tie
Si nde ses finz'a pilos garrigadu,
Tue a nois unu nond'as dadu
Chi de sa mesa nd'est ancor'inie,
O non cheres intender prus sentore
De nuscu, intendere e sapore.

Giuseppe Pintore *

Su sabore si leat in totue
fintzes chi ses cantende poesia.
Custa juanne est sa palte mia
no isco chi sabore bi leas tue.
O ti cuntentas de l'intender'ebbia
tando contas iscultadore in cue.
Chi l'assaboras cando chi l'intendes
a su tema meu onore rendes.

Lussorio Cambiganu ^^^^^^^^

De nudda pius intendo sentore
Ca parides in ateru impiciados
Tue..Gosamu..Paula e Pintore
Carta .. Teresa.. Canova cuados
Montesu chin Cadau e Barore
Non bos poto obbrigare ligados
Totu sezis de bona calidade
.. ponide poesia in libeltade

Giovanni Pau

Rino ajutoriu nd'est gridende
Ca poetas bind'ad'in cantidade,
Narat, cun custos, no non mi lassade
Ca biu biu mi son manighende
Pintore, chi sapore b'est leende
Mi paret prenu de felicidade
E finzas juanne Pau nd'est cuntentu
Ca intendet sol'isse in su momentu.

Giuseppe Pintore *

Ch'intendes su tzoccu e sa campana
ti pones tando in pregadoria.
E lussoriu ch'est in s'aera sana
su nuscu e fiores leat ebbia.
Deo so sabores de una ia
amento e ristoru mi nde dana.
Pius de sonos e nuschos de fiores
m'agradat de su tzibu so sabores.

Lussorio Cambiganu ^^^^^^^^^

Giuanne tue naras intendende
A mie pares suldu pedrale
Ca pagu mi pares iscultende
E cando cheres.. tue intendes male
De tene sa difesa so isetende
De sensu ‘e s’ iscultu.. e de su cale
Tue ‘alu no as dadu s’ impoltu
In custu mundu drommidu e moltu

Giovanni Pau

Si tue a su pastu onore rendese
Ca bi agattas in cue onzi sapore
M'a sa poesia 'e s'improvisadore
Narami cale faeddu b'ispendese
Ca si sa poesia non l'intendese
Chi bi lees gustu lu ses in errore
Ca s'a s'urija non bi arrivat sonu
Non potes narrer s'est mal'o s'est bonu.

Lussorio Cambiganu ^^^^^^^^^

Gianne Pau tando tue puru
Già paret chi sias intradu in tema
Ma non pesses chi eo tima e trema
Cantu ti mustras chin su murru duru
Ballamus tando a su duru-duru
nuscu. sabore e iscultu ..s’ ischema
si ateros cheren fagher abbitu
pro totu b’at logu .. semus apitu

Giuseppe Pintore *

Su gustu de su versu improvisu
no est in s'orija ma in sa mente.
chi cantas a contu tou solamente
inoghe como ti do custu avisu.
Niune intendet est diferente
ma s'idet su cuntentu in su visu
a tie t'at'a parrere un'ispantu
in s'intimu assaboras cussu cantu.

Lussorio Cambiganu ^^^^^^^^^

Ello it’ at a esser s’ ispiru
Si non de ponner fatu a su profumu
Cussu chi columat finas a biru
Sa mente e su coro totu in dd’ unu
Su nuscu faghet passare s’ airu
E torrat a umile su presumu
Cantu sa poesia at valore
Est grascia a su nuscu e su sabore

Giovanni Pau

Lussoriu in poeticu caminu
A manc'e destra t'istas a nuscare
A nar'in altu ti miran cuntinu
Che cane in sa campagn'a cazziare
E sighis nende chi ses ballerinu
C'a tie ti piaghede a ballare
Ma si de ballu no intendes sonu
Non creo chi a ballare bi ses bonu

Lussorio Cambiganu ^^^^^^^^^

Tue m’as nadu prima ‘e su fiagu
Chi bessit cando istamus nuschende
Ma tando nara tue unu pagu
It’ est su sonu ch’ essit sighende?
Cando s'intendet d’ omine su giagu
Est ca su sonu est troddiende
E tue chi ses mere de s’ iscultu
Paret chi li dias s’ ultimu sultu

Giuseppe Pintore *

Leade s'esempiu de unu gelatu
chi lu ides pintadu in d'una carta.
de sa bellesa sua ses atratu
a limba fora istas e buca isparta.
Deo mi l'assaboro sena farta
e tue pagu nde restas sodisfatu
No gosas cue nuscu ne ratza
cun Pau suldu in cussa piatza

Giovanni Pau

Pintore de gustu non bind'ada
Si no intendes una melodia
E non servit cantare in poesia
Cando chi non lu enid iscultada
Invezzes jeo a urija parada
Intendo su chi b'ana in fantasia
E-i s'onore a donzi versu rendo
Ma solamente a poi chi l'intendo,

Lussorio Cambiganu ^^^^^^^^^

Eo fato de nuscu s’ ideale
Chi podet allegrare cada vista
Finas cussos chi sun in s’ ispidale
O puru chi sa vida biden trista
Bastat unu profumu in cabidale
Pro dare bisos bonos a s’ artista
E finas chi de vista no at fortuna
Podet nuscare sole e sa luna.

Giuseppe Pintore *

A mi lassas su nuscu in cudd'ae
nudda bia pius bellu 'e su sabore.
chi t'agradat su fiagu tando bae
che s'abe de fiore in fiore.
Ma ides cue a mie as de onorae
sutzende su netare cun ardore
e su netare amenta no est fele
ca enit poi tramudadu in mele.

Giovanni Pau

Non creo ch'in su fragu ti console(s)
Pro chi as de nuscare sa fortuna
Non ses in manos nuschend'una pruna
Ca ch'est attesu cuss'immensa mole
Fragu non bi nde leas'a su sole
Fragu non bi nde leas'a sa luna
As'a nuscare a note e a die
Ma fragu non nd'arrivat dae inie,

Lussorio Cambiganu ^^^^^^^^^

Sun chimbe sos sensos umanos
Su sestu ‘alu non s’ ischit cal’ este
Su nuscu si leat in sas manos
O puru su profumu in sa beste
Fiores lu donan si sun galanos
Ma finas si sun de su mundu areste
Totu su mundu s’ idet a s’odore
Finas femina si donat amore

Giuseppe Pintore *

Su intende cun nuscu sun'astratos
inbetzes so sabores sun cuncrettos.
Chi gai bos sentides sodisfattos
cheret narre chi tenides difettos.
Proite mai azis a esser atatos
chi no ischides sabores cumpletos
de pane de ildura e de fruta
bivides una vida in pena acuta...

Giovanni Pau

No ad'a esser gai puzzolente
Si a s'amore li leas su fiagu
Cando ch'est gai mi piaghet pagu
Unu pagu chi torrad'a niente
Ma si s'intendet ch'est amor'ardente
Piaghet pur'a Semproni-e Giagu,
Ma si tue su fiagu l'intendese
Si bi lu naras a issa l'offendese.

Lussorio Cambiganu ^^^^^^^^^

Sa rosa non l’ isculto ne assaboro
De totu prima nde coglio su seru
Solu cando intendo s’ issoro
Profumu .. leo su sabore veru
A nudda balet si suldu est su coro
D’ intender paraulas de imperu
Totu le’ a fiagu de sa zente
S’ est bonu o puru est indezente

Giuseppe Pintore *

A t'amentas Lussoriu cudd'istoria
chi narat de su poveru mendicante
passat de fronte a unu ristorante
e su fiagu li dat tanta gloria
Su mere in tribunale sa vittoria
cheriat cun dinares in contante.
Su zuighe detzidit ca fit bonu
de su inare lu pagat cun su sonu.

Giovanni Pau

It'est su profumu jeo ignoro
Atteretantu naro 'e su sapore
Ca non mi dai pena nen dolore
De ogni pastu su sapor'insoro
Finzas senza sapore lu divoro
Gai a a su pastu rend'onore,
E non creo s'istogomo c'offendo
Si lu soddisfo si famin'intendo.

Lussorio Cambiganu ^^^^^^^^^

Fiagu malu salvat sa vida
Cando su gas nde bessit fora
Comente sa mela de sa colora
T’ avvisat si sa cosa est atrivida
Sa peta mala tue assaboras.
Giuanne non nd’ at mancu s’ ischida
Eo m’abbizo ‘e manigu guastu
a nuscu .. no apo bisonzu ‘e tastu

Giuseppe Pintore *

Deo no mi la passo mancu male
no m'intendo in nudda menguante.
Provo su pastu comente a s'usuale
isco chi est salidu o picante.
Chi mancat de pibere o de sale
bi lu ponzo e assaboro costante,
A connoschere su tzibu est a mie
Lussoriu e no ti tocat a tie...

Giovanni Pau

Pintore su pastu lu divorasa
E naras cantu siat saporidu
Ti lu assazzas a tottu sas'orasa
C'a piaghere lu cheres cundidu,
Ma si l'assazzas e nd'est tropp'uddidu
Non creo de su gustu t'innamorasa
Ca cand'in bucca su brujore intendese
Su sapore chi at no lu cumprendese,

Lussorio Cambiganu ^^^^^^^^^

Sabore non leas chena fiagu
Ca legiu podet esser su sabore
Comente a Giuanne tue Pintore
Intendes e assaborias pagu
Su late non cuagliat chena giagu
E gai nudda est bonu senza odore
Intendet ma non nd’ at su sentore
Manigas pische .. ma est de lagu

Giuseppe Pintore *

Juanne mancu pro cussu m'istrulo
Lussoriu a l'assaborare si coitada.
Chi calegunu a mandigare m'invittada
pro s'invitu chi mi faghet l'adulo,
cando atera manera no s'impitada
tando prima de mandigare lu sulo.
chi est fridu su sabore cumprendo
e de ateros viscios no nd'intendo.

Giovanni Pau

Cambiganu a umbe ses andende
Chi anima pares senza pasu
Non tenes latte e cheres fagher casu
Sulu una padedda morighende
Non bides chi sa tripid'est fundende
O non bi leas fragu cun su nasu,
Naras chi intendes fragu in donzi logu
Ma non su ch'est brujende in cussu fogu.

Lussorio Cambiganu ^^^^^^^^^

A sulu ti faghes sa cocaina
O ateras cannas fatas de droga
Chi siat issa murina o groga
Totu ch’ imbolas in sa cannighina
S’ orija piena de pedrischina
Ligada est a fune e chin sa soga
Issa nudda intendet e nde bogat
Si prima chin nuscu non si cumbinat

Giuseppe Pintore *

Sa limba cun so suos capillares
su gustu meu mai lu guastada,
proite cando totu l'impastada
a lu pagare no bada inares.
cando su tzibu valat dae nares
tando es malaidu e no nde tastada.
Invetzes deo c'apo custu impreu
mi lu gusto solu totu intreu

Lussorio Cambiganu ^^^^^^^^^

Sas musas cheren d’ arte sa bellura
Sa musica .. colore et armonia
Totu bi cheret in sa poesia
Chi s'animu e sa mente curat
Inie nuscos bat e cue addurant
Cando brotat fior’ e galania
Morit cando iscultat sa maja
sabores d’ imbija chi totu furat

Giuseppe Pintore *

Deo cun su gustu meu mi cumpenso
leo sabores de mare e de buscu,
peroe una cosa puru penso
chi siat sanu e no b'epat fruscu.
Sana siat s'orija cun su nuscu
umpare a totu sos atero senso
ca est orientamentu de s'umanu
a s'atera e os'astringo sa manu.

Francesco Canova **

Ma d'eo pro chi sia antzianu
ancora gia bisto,bene puru reu
e ringraziende so finas DEU
ma si mi presentana fiaghu istranu
o si mi presentana sabore feu
gia chelos lasso totarduos lontanu
e cun sa mia manna isperienzia
fiaghu nesabore ap'aintendenzia,

Giovanni Pau

In s'iscatula cranica inserrada
Bi l'ammus sa materia celebrale,
Custa lu est semper'impignada
A mandar'e rezzir'ogni signale,
Si nond'intendet funzionat male
E gai est pro su ch'issa mandada,
E si no intended'issa limba e nare
Non potes nusc'e gust'analizzare.