Donami unu sorrisu… rebbota chin Giuanne Pau

Donami unu sorrisu…

Lussorio Cambiganu.

E rie.. donamilu unu sorrisu

Tue chi ses de vida s’ allegria

Faghemi bider in su bellu visu

Sos versos de sa mia poesia

E rie.. porrimilu gai prezisu

A cando gosaias de galanìa

De cussa chi ti faghiat bolare

Comente rusignolu ischit cantare.

Acco’ ! t’ ido como sorridente Chi pares luna impare a sos isteddos Su sole chi t’ illuminat sa cara Bellesa pius unica che rara Penseris bonos e mai nieddos Ti renden che un' idea isplendente

Giovanni Pau

Prite ti ses lussoriu decisu
A fagher a-i custa cussu cantu
Pretendes de ti dare unu sorrisu
Pro cussu versu tou bellu tantu,
S'aiat s'idea mea cundivisu
Diat boltare su ris'in piantu
Versende lagrimas infinitas
Pro chi est a su risu chi l'invitas.

Lassa chi partat da s'idea sua
A lu esser cun tegus sorridente,
Pro chi l'invitas delicatamente
Chi cussa attraente musa tua,
Iss'a su risu ad'a dare fua
Cando chi lu meritas solamente
E mai lu ad'a benner resu
Cando chi su sorrisu nd'est pretesu.

Lussorio Cambiganu ^^^^^^^

In poesia dudas e piantu
Cheres ponner a sos versos mios
Ma tue Giuanne Pau ischis cantu
Abba bi curret in totu sos rios
So eo de pascescia e aguantu
Animu tenzo e non penseris fios
De totu canto dolu e sa bellura
Sa fritza tua non mi faghet paura

Giovanni Pau

Sas abbas de su riu istan currende
finament'a sas undas de su mare,
E jeo las lasso liberas colende
Non mi ponzo idea e las firmare,
E tue puru lassalas andare
Tantu a tie non che son trazzende,
E decantalu cussu murmuriu
De su currer de s'abba in cussu riu.

Decanta cantu podes sa bellura
Chi a tie ti passada a sa vista,
Decanta ogni belles'e sa natura
Ca tind'a dad'immensa una provista,
Senza istare sempre pista pista
Cand'ides atraente una figura
Chi a tie ti faghet incantare,
Mirala si ma lassamil'istare.

Lussorio Cambiganu ^^^^^^^^

Totu lasso a tie in sos disizos
Su c’ as.. chi as connotu et c’ as aer
Sos donos chi bisas e non fastizos
Bastat chi anneu a mie no as a daer
Pro me est totu bene .. solu in chizos
Tantu pro s’ acuntentu ‘e poetaer
Totu canto.. de vida pro bellura
Ma nudda leo pro nudda.. mancu a fura.

Giovanni Pau

Ma Sos disizzos mios sun d'intendere
De te o lussoriu onzi cantu
Ca tue sas oras mi des rendere
Lezzende a tie, amenas tantu,
E penso, su chi naro as'a cumprendere
Cando ti lu distruo onz'impiantu,
Lu fago pro intender dae nou
unatterunu bellu versu tou.

Lussorio Cambiganu ^^^^^^^^

Già l’ isco chi lu ses amantiosu
De cantu sa natura at donadu
A nois de dare pagh' ‘e gosu
A chie pius est ilfoltunadu
Eo puru ti rispundo chena ‘elosu
Ca l’ ischis chi t’apo in coidadu
Si faghet in manera surprendente
Chi pasat siat coro che sa mente

L’ ischis chi so amant’ e padre Luca
E de Limbudu 'ischente e paesanu
Non do’ fenuju e fozas de latuca
A chie amigu mi porrit sa manu
Muntenzo su chi m’essit dae ‘uca
E dono unu penseri subrumanu
Cussu chi restat semper in s’ ammentu
Comente un’ antigu testamentu.

Giovanni Pau

Cando ch'a mie b'enin in favore
Sas noe d'ipocrene verginellas,
Mi faghen visitare sas istellas
Chi mandan'a inoghe onzi lugore
Pro potet racontare chin'amore
Sas cosas chi mi miro tantu bellas,
Ca a mie da cussa adde lontana
Donzi tant'un'azzudu mi lu dana.

Bi enit Melpomene cun Talia
Tersicore, Urania cun Eratu
E restan a mi fagher Cumpanzia
Finzas a cando non so sodisfattu,
Dendemi vigore Chin fantasia
E sensibilidade in mod'adatu
Pro poder presentar'a sa zente
Unu versu pulidu e atraente.

"donamiddu unu sorrisu" traduzione di Arobetu Musiu della mia "donami unu sorrisu" : in lingua campidanese

Arrì.. donamiddu unu sorrisu
Tui chi ses de vida s'allerghia
Faimì biri in su bellu bisu
Is versus de sa mia poesia
Arrì.. paramiddu aici precisu
A candu gosaiat sa mente mia
De cussa chi ti faiat bolai
Comenti arresanniolu scit cantai

Mira ! ti biu imoi arriendi
Chi paris luna impari a is isteddus
Su soli chi t'illùminat sa cara
Bellesa prus ùnica chi rara
Pensamentus bonus e mai nieddus
Ti faint che una idea splendenti