su cumandante

su cumandante

Tue de s’ anarchia cumadante
As chelfidu su mundu isfidare
Chena mai in segus torrare
Comente bolu de cuss’ aliante.
Tue atesu sempre pius distante
Dae terra ch’ as chelfidu lassare
Su bolu chin Pegasu a dominare
Sa mente in su penseri custante.

Sa forza in tegus est dominante
De brincare sas lacanas umanas
Comente cussas aes chi lontanas
Si ponen totu sas nues innante.
Sa manu porris a su viandante
Chi cheret bider sas bijones giaras
Ritza s’ ischina .. isperiat sas caras
Chena nd’ esser d’ issas su mendicante.

Aju nd’ant sos istoricos de fagher
Un cuadru.. ‘ue ponner a tie
S’ idea est comente fiocu ‘e nie
Chi solvet.. in su maludipingher
Issos .. ischin meda su culu lingher
Chena narrer pro ite? E nen pro chie
E gai ti los beffas e nde ries
Ca totu ischis fagher.. francu fingher.